tum bhi aaoge mere ghar jo sanam kya hoga

tum bhī aaoge mire ghar jo sanam kyā hogā

mujh par ik raat karoge jo karam kyā hogā

ek aalam ne kiyā hai safar-e-mulk-e-adam

ham bhī jāveñge agar sū-e-adam kyā hogā

dam-e-ruḳhsat hai mirā aaj mirī bālīñ par

tum agar vaqfa karoge koī dam kyā hogā

dekh us chāk-e-garebāñ ko to ye kahtī hai sub.h

jis kā siina hai ye kuchh us kā shikam kyā hogā

chain ho jā.egā dil ko mire az-rāh-e-karam

merī āñkhoñ pe rakhoge jo qadam kyā hogā

sohbat-e-ġhair kā inkār to karte ho vale

khāoge tum jo mire sar kī qasam kyā hogā

shāna ik umr se kartā hai do-vaqtī ḳhidmat

tujh ko mālūm hai ai dīda-e-nam kyā hogā

'mus.hafī' vasl meñ us ke jo muā jaatā ho

us pe ayyām-e-judā.ī meñ sitam kyā hogā

tum bhi aaoge mere ghar jo sanam kya hoga

mujh par ek raat karoge jo karam kya hoga

ek aalam ne kiya hai safar-e-mulk-e-adam

hum bhi jawenge agar su-e-adam kya hoga

dam-e-ruKHsat hai mera aaj meri baalin par

tum agar waqfa karoge koi dam kya hoga

dekh us chaak-e-gareban ko to ye kahti hai subh

jis ka sina hai ye kuchh us ka shikam kya hoga

chain ho jaega dil ko mere az-rah-e-karam

meri aankhon pe rakhoge jo qadam kya hoga

sohbat-e-ghair ka inkar to karte ho wale

khaoge tum jo mere sar ki qasam kya hoga

shana ek umr se karta hai do-waqti KHidmat

tujh ko malum hai ai dida-e-nam kya hoga

'mushafi' wasl mein us ke jo mua jata ho

us pe ayyam-e-judai mein sitam kya hoga