andar ka zahr chum liya dhul ke aa gae

andar kā zahr chuum liyā dhul ke aa ga.e

kitne sharīf log the sab khul ke aa ga.e

sūraj se jañg jītne nikle the bevaqūf

saare sipāhī mom ke the ghul ke aa ga.e

masjid meñ duur duur koī dūsrā na thā

ham aaj apne aap se mil-jul ke aa ga.e

nīñdoñ se jañg hotī rahegī tamām umr

āñkhoñ meñ band ḳhvāb agar khul ke aa ga.e

sūraj ne apnī shakl bhī dekhī thī pahlī baar

ā.īne ko maze bhī taqābul ke aa ga.e

anjāne saa.e phirne lage haiñ idhar udhar

mausam hamāre shahr meñ kābul ke aa ga.e

andar ka zahr chum liya dhul ke aa gae

kitne sharif log the sab khul ke aa gae

suraj se jang jitne nikle the bewaquf

sare sipahi mom ke the ghul ke aa gae

masjid mein dur dur koi dusra na tha

hum aaj apne aap se mil-jul ke aa gae

nindon se jang hoti rahegi tamam umr

aankhon mein band KHwab agar khul ke aa gae

suraj ne apni shakl bhi dekhi thi pahli bar

aaine ko maze bhi taqabul ke aa gae

anjaane sae phirne lage hain idhar udhar

mausam hamare shahr mein kabul ke aa gae