dil gaya be-qarariyan na gain

dil gayā be-qarāriyāñ na ga.iiñ

ishq kī ḳhām-kāriyāñ na ga.iiñ

mar miTe naam par vafā ke ham

terī be-e'tibāriyāñ na ga.iiñ

lab pe aayā na us kā naam kabhī

ġham kī parhez-gāriyāñ na ga.iiñ

khap ga.ī jaan bujh ga.e tevar

ashk kī tābdāriyāñ na ga.iiñ

tauba karne ko ham ne kī to magar

tauba kī sharmsāriyāñ na ga.iiñ

jaan aa hī ga.ī laboñ pe magar

shauq kī parda-dāriyāñ na ga.iiñ

vo hai kiina ki sard-mehrī hai

apnī jānib se yāriyāñ na ga.iiñ

girya bhī hai 'asar' kā mastāna

na ga.iiñ bāda-ḳhvāriyāñ na ga.iiñ

dil gaya be-qarariyan na gain

ishq ki KHam-kariyan na gain

mar miTe nam par wafa ke hum

teri be-e'tibariyan na gain

lab pe aaya na us ka nam kabhi

gham ki parhez-gariyan na gain

khap gai jaan bujh gae tewar

ashk ki tabdariyan na gain

tauba karne ko hum ne ki to magar

tauba ki sharmsariyan na gain

jaan aa hi gai labon pe magar

shauq ki parda-dariyan na gain

wo hai kina ki sard-mehri hai

apni jaanib se yariyan na gain

girya bhi hai 'asar' ka mastana

na gain baada-KHwariyan na gain