fasl-e-gul sath liye bagh mein kya aati hai

fasl-e-gul saath liye baaġh meñ kyā aatī hai

bulbul-e-naġhma-sarā rū-ba-qazā aatī hai

dil dhaḌaktā hai ye kahte hue us mahfil meñ

yaañ kisī ko ḳhafaqāñ kī bhī davā aatī hai

aaj vo shoḳh hai aur kasrat-e-ārā.ish hai

dekh kis vāste pisne ko hinā aatī hai

kyā khule baaġh meñ vo chashm-e-hijāb-ālūda

aañkh uThāte hue nargis ko hayā aatī hai

jāñ-kanī husn-parastoñ ko girāñ kyā guzre

bhes meñ hūr-e-bahishtī ke qazā aatī hai

is liye rashk-e-chaman baaġh meñ gul hañste haiñ

ki uḌātī tirī raftār sabā aatī hai

maraz-e-ishq se 'bīmār' jo ghabrātā hai

yaar kahtā hai mujhe ḳhuub davā aatī hai

fasl-e-gul sath liye bagh mein kya aati hai

bulbul-e-naghma-sara ru-ba-qaza aati hai

dil dhaDakta hai ye kahte hue us mahfil mein

yan kisi ko KHafaqan ki bhi dawa aati hai

aaj wo shoKH hai aur kasrat-e-araish hai

dekh kis waste pisne ko hina aati hai

kya khule bagh mein wo chashm-e-hijab-aluda

aankh uThate hue nargis ko haya aati hai

jaan-kani husn-paraston ko giran kya guzre

bhes mein hur-e-bahishti ke qaza aati hai

is liye rashk-e-chaman bagh mein gul hanste hain

ki uDati teri raftar saba aati hai

maraz-e-ishq se 'bimar' jo ghabraata hai

yar kahta hai mujhe KHub dawa aati hai