hans raha tha main bahut go waqt wo rone ka tha

hañs rahā thā maiñ bahut go vaqt vo rone kā thā

saḳht kitnā marhala tujh se judā hone kā thā

rat-jage taqsīm kartī phir rahī haiñ shahr meñ

shauq jin āñkhoñ ko kal tak raat meñ sone kā thā

is safar meñ bas mirī tanhā.ī mere saath thī

har qadam kyuuñ ḳhauf mujh ko bhiiḌ meñ khone kā thā

har bun-e-mū se darindoñ kī sadā aane lagī

kaam hī aisā badan meñ ḳhvāhisheñ bone kā thā

maiñ ne jab se ye sunā hai ḳhud se bhī nādim huuñ maiñ

zikr tujh hoñToñ pe mere dar-ba-dar hone kā thā

hans raha tha main bahut go waqt wo rone ka tha

saKHt kitna marhala tujh se juda hone ka tha

rat-jage taqsim karti phir rahi hain shahr mein

shauq jin aankhon ko kal tak raat mein sone ka tha

is safar mein bas meri tanhai mere sath thi

har qadam kyun KHauf mujh ko bhiD mein khone ka tha

har bun-e-mu se darindon ki sada aane lagi

kaam hi aisa badan mein KHwahishen bone ka tha

main ne jab se ye suna hai KHud se bhi nadim hun main

zikr tujh honTon pe mere dar-ba-dar hone ka tha