hai ye takiya teri ataon par

hai ye takiya tirī atāoñ par

vahī isrār hai ḳhatāoñ par

raheñ nā-āshnā zamāne se

haq hai terā ye āshnāoñ par

rahravo bā-ḳhabar raho ki gumāñ

rahzanī kā hai rahnumāoñ par

hai vo der āshnā to aib hai kyā

marte haiñ ham inhīñ adāoñ par

us ke kūche meñ haiñ vo be-par o baal

uḌte phirte haiñ jo havāoñ par

shahsavāroñ pe band hai jo raah

vaqf hai yaañ barahna paañv par

nahīñ mun.im ko us kī buuñd nasīb

meñh barastā hai jo gadāoñ par

nahīñ mahdūd baḳhshisheñ terī

zāhidoñ par na pārsāoñ par

haq se darḳhvāst afv kī 'hālī'

kiije kis muñh se in ḳhatāoñ par

hai ye takiya teri ataon par

wahi israr hai KHataon par

rahen na-ashna zamane se

haq hai tera ye aashnaon par

rahrawo ba-KHabar raho ki guman

rahzani ka hai rahnumaon par

hai wo der aashna to aib hai kya

marte hain hum inhin adaon par

us ke kuche mein hain wo be-par o baal

uDte phirte hain jo hawaon par

shahsawaron pe band hai jo rah

waqf hai yan barahna panw par

nahin munim ko us ki bund nasib

meinh barasta hai jo gadaon par

nahin mahdud baKHshishen teri

zahidon par na parsaon par

haq se darKHwast afw ki 'haali'

kije kis munh se in KHataon par