hayat insan ki sar ta pa zaban malum hoti hai

hayāt insāñ kī sar tā pā zabāñ mālūm hotī hai

ye duniyā inqilāb-e-āsmāñ mālūm hotī hai

mukaddar hai ḳhizāñ ke ḳhuun se aish-e-bahār-e-gul

ḳhizāñ kī rut bahār-e-be-ḳhizāñ mālūm hotī hai

mujhe nākāmi-e-paiham se māyūsī nahīñ hotī

abhī ummīd merī naujavāñ mālūm hotī hai

koī jab naala kartā hai kaleja thaam letā huuñ

fuġhān-e-ġhair bhī apnī fuġhāñ mālūm hotī hai

ma.āl-e-dard-o-ġham dekho sadā-e-sāz-e-ishrat bhī

utar jaatī hai jab dil meñ fuġhāñ mālūm hotī hai

chaman meñ andalīb-e-zār kī fariyād ai 'aḳhtar'

dil-e-nādāñ ko apnī dāstāñ mālūm hotī hai

hayat insan ki sar ta pa zaban malum hoti hai

ye duniya inqilab-e-asman malum hoti hai

mukaddar hai KHizan ke KHun se aish-e-bahaar-e-gul

KHizan ki rut bahaar-e-be-KHizan malum hoti hai

mujhe nakaami-e-paiham se mayusi nahin hoti

abhi ummid meri naujawan malum hoti hai

koi jab nala karta hai kaleja tham leta hun

fughan-e-ghair bhi apni fughan malum hoti hai

maal-e-dard-o-gham dekho sada-e-saz-e-ishrat bhi

utar jati hai jab dil mein fughan malum hoti hai

chaman mein andalib-e-zar ki fariyaad ai 'aKHtar'

dil-e-nadan ko apni dastan malum hoti hai