jigar ke TukDe hue jal ke dil kabab hua

jigar ke TukḌe hue jal ke dil kabāb huā

ye ishq jaan ko mere koī azaab huā

kiyā jo qatl mujhe tum ne ḳhuub kaam kiyā

ki maiñ azaab se chhūTā tumheñ savāb huā

kabhī to shefta us ne kahā kabhī shaidā

ġharaz ki roz nayā ik mujhe ḳhitāb huā

piyūñ na rashk se ḳhuuñ kyūñki dam-ba-dam apnā

ki saath ġhair ke vo aaj ham-sharāb huā

tumhāre lab ke lab-e-jām ne liye bose

lab apne kaaTā kiyā maiñ na kāmyāb huā

galī galī tirī ḳhātir phirā ba-chashm-e-pur-āb

lagā ke tujh se dil apnā bahut ḳharāb huā

tirī galī meñ bahā.e phire hai sail-e-sarishk

hamārā kāsa-e-sar kyā huā habāb huā

javāb-e-ḳhat ke na likhne se ye huā mālūm

ki aaj se hameñ ai nāma-bar javāb huā

mañgā.ī thī tirī tasvīr dil kī taskīñ ko

mujhe to dekhte hī aur iztirāb huā

sitam tumhāre bahut aur din hisāb kā ek

mujhe hai soch ye hī kis tarah hisāb huā

'zafar' badal ke radīf aur tū ġhazal vo sunā

ki jis kā tujh se har ik sher intiḳhāb huā

jigar ke TukDe hue jal ke dil kabab hua

ye ishq jaan ko mere koi azab hua

kiya jo qatl mujhe tum ne KHub kaam kiya

ki main azab se chhuTa tumhein sawab hua

kabhi to shefta us ne kaha kabhi shaida

gharaz ki roz naya ek mujhe KHitab hua

piyun na rashk se KHun kyunki dam-ba-dam apna

ki sath ghair ke wo aaj ham-sharab hua

tumhaare lab ke lab-e-jam ne liye bose

lab apne kaTa kiya main na kaamyab hua

gali gali teri KHatir phira ba-chashm-e-pur-ab

laga ke tujh se dil apna bahut KHarab hua

teri gali mein bahae phire hai sail-e-sarishk

hamara kasa-e-sar kya hua habab hua

jawab-e-KHat ke na likhne se ye hua malum

ki aaj se hamein ai nama-bar jawab hua

mangai thi teri taswir dil ki taskin ko

mujhe to dekhte hi aur iztirab hua

sitam tumhaare bahut aur din hisab ka ek

mujhe hai soch ye hi kis tarah hisab hua

'zafar' badal ke radif aur tu ghazal wo suna

ki jis ka tujh se har ek sher intiKHab hua