kab tak karenge jabr dil-e-na-subur par

kab tak kareñge jabr dil-e-nā-subūr par

muusā to jā ke baiTh rahe koh-e-tūr par

koī mujhe batā.e ki ab kyā javāb duuñ

vo mujh se uzr karte haiñ mere qusūr par

tālib haiñ jo tire unheñ jannat se kyā ġharaz

paḌtī nahīñ hai aañkh shahīdoñ kī huur par

jalva dikhā.iye hameñ bas uzr ho chukā

jalne ke vāste nahīñ aa.e haiñ tuur par

zāhid bhī is zamāne ke āshiq mizāj haiñ

jiite haiñ us ko dekh ke marte haiñ huur par

ghar kar ga.iiñ na dil meñ mirī ḳhāksāriyāñ

nāzāñ the aap bhī bahut apne ġhurūr par

baḳhshe ga.e na ham se jo do-chār bāda-ḳhvār

bhinkeñgī makkhiyāñ haiñ sharāb-e-tuhūr par

kuchh shoḳhiyoñ ke rañg bhī betābiyoñ meñ haiñ

kis kī nazar paḌī hai dil-e-nā-subūr par

zāhid kī tarah ham ko bhī jannat kī hai talāsh

apnā bhī aa gayā hai dil ik rashk-e-hūr par

rakkhe kahīñ ye shauq-e-rihā.ī mujhe na qaid

taḌpā agar yahīñ to raheñge zarūr par

'beḳhud' na DhūñD koī vasīla najāt kā

ye munhasir hai rahmat-e-rabb-e-ġhafūr par

kab tak karenge jabr dil-e-na-subur par

musa to ja ke baiTh rahe koh-e-tur par

koi mujhe batae ki ab kya jawab dun

wo mujh se uzr karte hain mere qusur par

talib hain jo tere unhen jannat se kya gharaz

paDti nahin hai aankh shahidon ki hur par

jalwa dikhaiye hamein bas uzr ho chuka

jalne ke waste nahin aae hain tur par

zahid bhi is zamane ke aashiq mizaj hain

jite hain us ko dekh ke marte hain hur par

ghar kar gain na dil mein meri KHaksariyan

nazan the aap bhi bahut apne ghurur par

baKHshe gae na hum se jo do-chaar baada-KHwar

bhinkengi makkhiyan hain sharab-e-tuhur par

kuchh shoKHiyon ke rang bhi betabiyon mein hain

kis ki nazar paDi hai dil-e-na-subur par

zahid ki tarah hum ko bhi jannat ki hai talash

apna bhi aa gaya hai dil ek rashk-e-hur par

rakkhe kahin ye shauq-e-rihai mujhe na qaid

taDpa agar yahin to rahenge zarur par

'beKHud' na DhunD koi wasila najat ka

ye munhasir hai rahmat-e-rabb-e-ghafur par