KHair auron ne bhi chaha to hai tujh sa hona

ḳhair auroñ ne bhī chāhā to hai tujh sā honā

ye alag baat ki mumkin nahīñ aisā honā

dekhtā aur na Thahartā to koī baat bhī thī

jis ne dekhā hī nahīñ us se ḳhafā kyā honā

tujh se duurī meñ bhī ḳhush rahtā huuñ pahle kī tarah

bas kisī vaqt burā lagtā hai tanhā honā

yuuñ merī yaad meñ mahfūz haiñ tere ḳhad-o-ḳhāl

jis tarah dil meñ kisī shai kī tamannā honā

zindagī marka-e-rūh-o-badan hai 'mushtāq'

ishq ke saath zarūrī hai havas kā honā

KHair auron ne bhi chaha to hai tujh sa hona

ye alag baat ki mumkin nahin aisa hona

dekhta aur na Thaharta to koi baat bhi thi

jis ne dekha hi nahin us se KHafa kya hona

tujh se duri mein bhi KHush rahta hun pahle ki tarah

bas kisi waqt bura lagta hai tanha hona

yun meri yaad mein mahfuz hain tere KHad-o-KHal

jis tarah dil mein kisi shai ki tamanna hona

zindagi marka-e-ruh-o-badan hai 'mushtaq'

ishq ke sath zaruri hai hawas ka hona