misal isko kahan hai koi zamane mein

misāl is kī kahāñ hai koī zamāne meñ

ki saare khone ke ġham paa.e ham ne paane meñ

vo shakl pighlī to har shai meñ Dhal ga.ī jaise

ajiib baat huī hai use bhulāne meñ

jo muntazir na milā vo to ham haiñ sharminda

ki ham ne der lagā dī palaT ke aane meñ

latīf thā vo taḳhayyul se ḳhvāb se nāzuk

gañvā diyā use ham ne hī āzmāne meñ

samajh liyā thā kabhī ik sarāb ko dariyā

par ik sukūn thā ham ko fareb khāne meñ

jhukā daraḳht havā se to āñdhiyoñ ne kahā

ziyāda farq nahīñ jhukne TuuT jaane meñ

misal is ki kahan hai koi zamane mein

ki sare khone ke gham pae hum ne pane mein

wo shakl pighli to har shai mein Dhal gai jaise

ajib baat hui hai use bhulane mein

jo muntazir na mila wo to hum hain sharminda

ki hum ne der laga di palaT ke aane mein

latif tha wo taKHayyul se KHwab se nazuk

ganwa diya use hum ne hi aazmane mein

samajh liya tha kabhi ek sarab ko dariya

par ek sukun tha hum ko fareb khane mein

jhuka daraKHt hawa se to aandhiyon ne kaha

ziyaada farq nahin jhukne TuT jaane mein