musafiron mein abhi talKHiyan purani hain
musāfiroñ meñ abhī talḳhiyāñ purānī haiñ
safar nayā hai magar kashtiyāñ purānī haiñ
ye kah ke us ne shajar ko tane se kaaT diyā
ki is daraḳht meñ kuchh Tahniyāñ purānī haiñ
ham is liye bhī na.e ham-safar talāsh kareñ
hamāre haath meñ baisākhiyāñ purānī haiñ
ajiib soch hai is shahr ke makīnoñ kī
makāñ na.e haiñ magar khiḌkiyāñ purānī haiñ
palaT ke gaañv meñ maiñ is liye nahīñ aayā
mire badan pe abhī dhajjiyāñ purānī haiñ
safar-pasand tabī.at ko ḳhauf-e-sahrā kyā
'sabā' havā kī vahī sīTiyāñ purānī haiñ
musafiron mein abhi talKHiyan purani hain
safar naya hai magar kashtiyan purani hain
ye kah ke us ne shajar ko tane se kaT diya
ki is daraKHt mein kuchh Tahniyan purani hain
hum is liye bhi nae ham-safar talash karen
hamare hath mein baisakhiyan purani hain
ajib soch hai is shahr ke makinon ki
makan nae hain magar khiDkiyan purani hain
palaT ke ganw mein main is liye nahin aaya
mere badan pe abhi dhajjiyan purani hain
safar-pasand tabiat ko KHauf-e-sahra kya
'saba' hawa ki wahi siTiyan purani hain
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
