nikal jae yunhi furqat mein dam kya

nikal jaa.e yūñhī furqat meñ dam kyā

na hogā aap kā mujh par karam kyā

hañse bhī ro.e bhī lekin na samjhe

ḳhushī kyā chiiz hai duniyā meñ ġham kyā

mubārak zālimoñ ko zulm ham par

jo apnā hī kiyā hai us kā ġham kyā

miTā jab imtiyāz-e-kufr o īmāñ

makān-e-kāba kyā baitus-sanam kyā

nahīñ jab quvvat-e-ehsās dil meñ

ġham-e-duniyā surūr-e-jām-e-jam kyā

guzar hī jā.eñge ġhurbat ke din bhī

kareñ do din ko ab aḳhlāq kam kyā

mirī bigḌī huī taqdīr bhī hai

tumhāre turra-e-gesū kā ḳham kyā

mirī taqdīr meñ likkhā hai tū ne

batā ai mālik-e-lauh o qalam kyā

bhulā degī hameñ do din meñ duniyā

hamārī shā.irī kyā aur ham kyā

har ik mushkil ko hal kartī hai jab maut

karūñ aage kisī ke sar ko ḳham kyā

'ravāñ' ke dard kā aalam na pūchho

koī yuuñ hogā mast-e-jām-e-jam kyā

nikal jae yunhi furqat mein dam kya

na hoga aap ka mujh par karam kya

hanse bhi roe bhi lekin na samjhe

KHushi kya chiz hai duniya mein gham kya

mubarak zalimon ko zulm hum par

jo apna hi kiya hai us ka gham kya

miTa jab imtiyaz-e-kufr o iman

makan-e-kaba kya baitus-sanam kya

nahin jab quwwat-e-ehsas dil mein

gham-e-duniya surur-e-jam-e-jam kya

guzar hi jaenge ghurbat ke din bhi

karen do din ko ab aKHlaq kam kya

meri bigDi hui taqdir bhi hai

tumhaare turra-e-gesu ka KHam kya

meri taqdir mein likkha hai tu ne

bata ai malik-e-lauh o qalam kya

bhula degi hamein do din mein duniya

hamari shairi kya aur hum kya

har ek mushkil ko hal karti hai jab maut

karun aage kisi ke sar ko KHam kya

'rawan' ke dard ka aalam na puchho

koi yun hoga mast-e-jam-e-jam kya