pyar ki nai dastak dil pe phir sunai di

pyaar kī na.ī dastak dil pe phir sunā.ī dī

chāñd sī koī sūrat ḳhvāb meñ dikhā.ī dī

kis ne merī palkoñ pe titliyoñ ke par rakkhe

aaj apnī aahaT bhī der tak sunā.ī dī

ham ġharīb logoñ ke aaj bhī vahī din haiñ

pahle kyā asīrī thī aaj kyā rihā.ī dī

bārishoñ ke chehre par āñsuoñ se likhnā hai

kuchh na koī paḌh paa.e aisī raushnā.ī dī

āsmāñ zamīñ rakh kar donoñ ek muTThī meñ

ik zarā sī laḌkī ne pyaar kī ḳhudā.ī dī

ye tunak-mizājī to ḳhair us kī fitrat hai

varna us ne chāhat bhī ham ko intihā.ī dī

ye tanāv qudrat ne do diloñ meñ kyuuñ rakkhā

mujh ko kaj-kulāhī dī us ko kaj-adā.ī dī

pyar ki nai dastak dil pe phir sunai di

chand si koi surat KHwab mein dikhai di

kis ne meri palkon pe titliyon ke par rakkhe

aaj apni aahaT bhi der tak sunai di

hum gharib logon ke aaj bhi wahi din hain

pahle kya asiri thi aaj kya rihai di

barishon ke chehre par aansuon se likhna hai

kuchh na koi paDh pae aisi raushnai di

aasman zamin rakh kar donon ek muTThi mein

ek zara si laDki ne pyar ki KHudai di

ye tunak-mizaji to KHair us ki fitrat hai

warna us ne chahat bhi hum ko intihai di

ye tanaw qudrat ne do dilon mein kyun rakkha

mujh ko kaj-kulahi di us ko kaj-adai di