ruh ko rah-e-adam mein mera tan yaad aaya

ruuh ko rāh-e-adam meñ mirā tan yaad aayā

dasht-e-ġhurbat meñ musāfir ko vatan yaad aayā

chuTkiyāñ dil meñ mire lene lagā nāḳhun-e-ishq

gul-badan dekh ke us gul kā badan yaad aayā

vahm hī vahm meñ apnī huī auqāt basar

kamar-e-yār ko bhūle to dahan yaad aayā

barg-e-gul dekh ke āñkhoñ meñ tire phir ga.e lab

ġhuncha chaTkā to mujhe lutf-e-suḳhan yaad aayā

dar-ba-dar phir ke dilā ghar kī hameñ qadr huī

rāh-e-ġhurbat meñ jo bhūle to vatan yaad aayā

aah kyuuñ kheñch ke āñkhoñ meñ bhar aa.e aañsū

kyā qafas meñ tujhe ai murġh-e-chaman yaad aayā

phir 'amānat' mirā dil bhuul gayā aish o tarab

phir mujhe rauza-e-sultān-e-zaman yaad aayā

ruh ko rah-e-adam mein mera tan yaad aaya

dasht-e-ghurbat mein musafir ko watan yaad aaya

chuTkiyan dil mein mere lene laga naKHun-e-ishq

gul-badan dekh ke us gul ka badan yaad aaya

wahm hi wahm mein apni hui auqat basar

kamar-e-yar ko bhule to dahan yaad aaya

barg-e-gul dekh ke aankhon mein tere phir gae lab

ghuncha chaTka to mujhe lutf-e-suKHan yaad aaya

dar-ba-dar phir ke dila ghar ki hamein qadr hui

rah-e-ghurbat mein jo bhule to watan yaad aaya

aah kyun khench ke aankhon mein bhar aae aansu

kya qafas mein tujhe ai murgh-e-chaman yaad aaya

phir 'amanat' mera dil bhul gaya aish o tarab

phir mujhe rauza-e-sultan-e-zaman yaad aaya