sabhi ka dhup se bachne ko sar nahin hota

sabhī kā dhuup se bachne ko sar nahīñ hotā

har aadmī ke muqaddar meñ ghar nahīñ hotā

kabhī lahū se bhī tārīḳh likhnī paḌtī hai

har ek ma.arka bātoñ se sar nahīñ hotā

maiñ us kī aañkh kā aañsū na ban sakā varna

mujhe bhī ḳhaak meñ milne kā Dar nahīñ hotā

mujhe talāsh karoge to phir na pāoge

maiñ ik sadā huuñ sadāoñ kā ghar nahīñ hotā

hamārī aañkh ke aañsū kī apnī duniyā hai

kisī faqīr ko shāhoñ kā Dar nahīñ hotā

maiñ us makān meñ rahtā huuñ aur zinda huuñ

'vasīm' jis meñ havā kā guzar nahīñ hotā

sabhi ka dhup se bachne ko sar nahin hota

har aadmi ke muqaddar mein ghar nahin hota

kabhi lahu se bhi tariKH likhni paDti hai

har ek marka baaton se sar nahin hota

main us ki aankh ka aansu na ban saka warna

mujhe bhi KHak mein milne ka Dar nahin hota

mujhe talash karoge to phir na paoge

main ek sada hun sadaon ka ghar nahin hota

hamari aankh ke aansu ki apni duniya hai

kisi faqir ko shahon ka Dar nahin hota

main us makan mein rahta hun aur zinda hun

'wasim' jis mein hawa ka guzar nahin hota