siyahkar the ba-safa ho gae hum

siyahkār the bā-safā ho ga.e ham

tire ishq meñ kyā se kyā ho ga.e ham

na jaanā ki shauq aur bhaḌkegā merā

vo samjhe ki us se judā ho ga.e ham

dam-e-vāpsīñ aa.e pursish ko nāhaq

bas ab jaao tum se ḳhafā ho ga.e ham

hue mahv kis kī tamannā meñ aise

ki mustaġhni-e-mā-sivā ho ga.e ham

unheñ ranj ab kyuuñ huā ham to ḳhush haiñ

ki mar kar shahīd-e-vafā ho ga.e ham

jab un se adab ne na kuchh muñh se māñgā

to ik paikar-e-iltijā ho ga.e ham

tirī fikr kā mubtilā ho gayā dil

magar qaid-e-ġham se rihā ho ga.e ham

fanā ho ke rāh-e-mohabbat meñ 'hasrat'

sazā-vār-e-ḳhuld-e-baqā ho ga.e ham

siyahkar the ba-safa ho gae hum

tere ishq mein kya se kya ho gae hum

na jaana ki shauq aur bhaDkega mera

wo samjhe ki us se juda ho gae hum

dam-e-wapsin aae pursish ko nahaq

bas ab jao tum se KHafa ho gae hum

hue mahw kis ki tamanna mein aise

ki mustaghni-e-ma-siwa ho gae hum

unhen ranj ab kyun hua hum to KHush hain

ki mar kar shahid-e-wafa ho gae hum

jab un se adab ne na kuchh munh se manga

to ek paikar-e-iltija ho gae hum

teri fikr ka mubtila ho gaya dil

magar qaid-e-gham se riha ho gae hum

fana ho ke rah-e-mohabbat mein 'hasrat'

saza-war-e-KHuld-e-baqa ho gae hum