tumhaare nam par maine har aafat sar pe rakkhi thi

tumhāre naam par maiñ ne har aafat sar pe rakkhī thī

nazar sho.aloñ pe rakkhī thī zabāñ patthar pe rakkhī thī

hamāre ḳhvāb to shahroñ kī saḌkoñ par bhaTakte the

tumhārī yaad thī jo raat bhar bistar pe rakkhī thī

maiñ apnā azm le kar manziloñ kī samt niklā thā

mashaqqat haath pe rakkhī thī qismat ghar pe rakkhī thī

inhīñ sāñsoñ ke chakkar ne hameñ vo din dikhā.e the

hamāre paañv kī miTTī hamāre sar pe rakkhī thī

sahar tak tum jo aa jaate to manzar dekh sakte the

diye palkoñ pe rakkhe the shikan bistar pe rakkhī thī

tumhaare nam par main ne har aafat sar pe rakkhi thi

nazar shoalon pe rakkhi thi zaban patthar pe rakkhi thi

hamare KHwab to shahron ki saDkon par bhaTakte the

tumhaari yaad thi jo raat bhar bistar pe rakkhi thi

main apna azm le kar manzilon ki samt nikla tha

mashaqqat hath pe rakkhi thi qismat ghar pe rakkhi thi

inhin sanson ke chakkar ne hamein wo din dikhae the

hamare panw ki miTTi hamare sar pe rakkhi thi

sahar tak tum jo aa jate to manzar dekh sakte the

diye palkon pe rakkhe the shikan bistar pe rakkhi thi