un ka ya apna tamasha dekho

un kā yā apnā tamāshā dekho

jo dikhātā hai zamāna dekho

vaqt ke paas haiñ kuchh tasvīreñ

koī Duubā hai ki ubhrā dekho

rañg sāhil kā nikhar aa.egā

do ghaḌī jānib-e-dariyā dekho

tilmilā uTThā ghanā sannāTā

phir koī niiñd se chauñkā dekho

ham-safar ġhair hue jaate haiñ

fāsla rah gayā kitnā dekho

barf ho jaatā hai sadiyoñ kā lahū

ek Thahrā huā lamha dekho

rañg uḌte haiñ tabassum kī tarah

ā.ina-ḳhānoñ kā daavā dekho

dil kī bigḌī huī sūrat hai yahāñ

ab koī aur ḳharāba dekho

yā kisī parde meñ gum ho jaao

yā uThā kar koī pardā dekho

dostī ḳhūn-e-jigar chāhtī hai

kaam mushkil hai to rasta dekho

saada kāġhaz kī tarah dil chup hai

hāsil-e-rañg-e-tamannā dekho

yahī taskīn kī sūrat hai to phir

chaar din ġham ko bhī apnā dekho

ġham-gusāroñ kā sahārā kab tak

ḳhud pe bhī kar ke bharosā dekho

apnī nīyat pe na jaao 'bāqī'

ruḳh zamāne kī havā kā dekho

un ka ya apna tamasha dekho

jo dikhata hai zamana dekho

waqt ke pas hain kuchh taswiren

koi Duba hai ki ubhra dekho

rang sahil ka nikhar aaega

do ghaDi jaanib-e-dariya dekho

tilmila uTTha ghana sannaTa

phir koi nind se chaunka dekho

ham-safar ghair hue jate hain

fasla rah gaya kitna dekho

barf ho jata hai sadiyon ka lahu

ek Thahra hua lamha dekho

rang uDte hain tabassum ki tarah

aaina-KHanon ka dawa dekho

dil ki bigDi hui surat hai yahan

ab koi aur KHaraba dekho

ya kisi parde mein gum ho jao

ya uTha kar koi parda dekho

dosti KHun-e-jigar chahti hai

kaam mushkil hai to rasta dekho

sada kaghaz ki tarah dil chup hai

hasil-e-rang-e-tamanna dekho

yahi taskin ki surat hai to phir

chaar din gham ko bhi apna dekho

gham-gusaron ka sahaara kab tak

KHud pe bhi kar ke bharosa dekho

apni niyat pe na jao 'baqi'

ruKH zamane ki hawa ka dekho