yun bhi dil ahbab ke humne gahe gahe rakkhe the

yuuñ bhī dil ahbāb ke ham ne gaahe gaahe rakkhe the

apne zaḳhm-e-nazar par ḳhush-fahmī ke phāhe rakkhe the

ham ne tazād-e-dahr ko samjhā do-rāhe tartīb diye

aur baratne nikle to dekhā sah-rāhe rakkhe the

raqs-kada ho bazm-e-suḳhan ho koī kārgah-e-fan ho

zardozoñ ne apnī mā-tahtī meñ julāhe rakkhe the

mohtasiboñ kī ḳhātir bhī apne iz.hār meñ kuchh pahlū

rakh to liye the ham ne ab chāhe an-chāhe rakkhe the

jo vaj.h-e-rāhat bhī na the aur TuuT ga.e to ġham na huā

aah vo rishte kyuuñ ham ne ik umr nibāhe rakkhe the

kāhkashāñ-bandī meñ suḳhan kī rah ga.ī 'sāz' kasar kaisī

lafz to ham ne chun ke najūme mohre maahe rakkhe the

yun bhi dil ahbab ke hum ne gahe gahe rakkhe the

apne zaKHm-e-nazar par KHush-fahmi ke phahe rakkhe the

hum ne tazad-e-dahr ko samjha do-rahe tartib diye

aur baratne nikle to dekha sah-rahe rakkhe the

raqs-kada ho bazm-e-suKHan ho koi kargah-e-fan ho

zardozon ne apni ma-tahti mein julahe rakkhe the

mohtasibon ki KHatir bhi apne izhaar mein kuchh pahlu

rakh to liye the hum ne ab chahe an-chahe rakkhe the

jo wajh-e-rahat bhi na the aur TuT gae to gham na hua

aah wo rishte kyun hum ne ek umr nibahe rakkhe the

kahkashan-bandi mein suKHan ki rah gai 'saz' kasar kaisi

lafz to hum ne chun ke najume mohre mahe rakkhe the