zamin se aage bhala jaana tha kahan maine

zamīñ se aage bhalā jaanā thā kahāñ maiñ ne

uThā.e rakkhā yūñhī sar pe āsmāñ maiñ ne

kisī ke hijr meñ shab se kalām karte hue

diye kī lau ko banāyā thā ham-zabāñ maiñ ne

shajar ko aag kisī aur ne lagā.ī thī

na jaane saañs meñ kyuuñ bhar liyā dhuāñ maiñ ne

kabhī to ā.eñge us samt se gulāb o charāġh

ye nahr yuuñ hī nikālī nahīñ yahāñ maiñ ne

mirī to aañkh mirā ḳhvāb TūTne se khulī

na jaane paañv dharā niiñd meñ kahāñ maiñ ne

zamin se aage bhala jaana tha kahan main ne

uThae rakkha yunhi sar pe aasman main ne

kisi ke hijr mein shab se kalam karte hue

diye ki lau ko banaya tha ham-zaban main ne

shajar ko aag kisi aur ne lagai thi

na jaane sans mein kyun bhar liya dhuan main ne

kabhi to aaenge us samt se gulab o charagh

ye nahr yun hi nikali nahin yahan main ne

meri to aankh mera KHwab TuTne se khuli

na jaane panw dhara nind mein kahan main ne