fard

itne baḌe nizām meñ sirf ik merī hī nekī se kyā hotā hai

maiñ to is se ziyāda kar hī kyā saktā huuñ

mez par apnī saarī duniyā

kāġhaz aur qalam aur TuuTī phūTī nazmeñ

saarī chīzeñ baḌe qarīne se rakh dī haiñ

dil meñ bharī huī haiñ itnī achchhī achchhī bāteñ

in bātoñ kā dhyān aatā hai to ye saañs baḌī hī besh-bahā lagtī hai

mujh ko bhī to kaisī kaisī bātoñ se rāhat miltī hai

mujh ko is rāhat meñ sādiq pā kar

saare jhuuT mirī tasdīq ko aa jaate haiñ

ek agar maiñ sachchā hotā

merī is duniyā meñ jitne qarīne saje hue haiñ

un kī jagah be-tartībī se paḌe hue kuchh TukḌe hote

mere jism ke TukḌe kaale jhuuT ke is chalte aare ke nīche

itne baḌe nizām se merī ik nekī Takrā saktī thī

agar ik maiñ hī sachchā hotā

itne baDe nizam mein sirf ek meri hi neki se kya hota hai

main to is se ziyaada kar hi kya sakta hun

mez par apni sari duniya

kaghaz aur qalam aur TuTi phuTi nazmen

sari chizen baDe qarine se rakh di hain

dil mein bhari hui hain itni achchhi achchhi baaten

in baaton ka dhyan aata hai to ye sans baDi hi besh-baha lagti hai

mujh ko bhi to kaisi kaisi baaton se rahat milti hai

mujh ko is rahat mein sadiq pa kar

sare jhuT meri tasdiq ko aa jate hain

ek agar main sachcha hota

meri is duniya mein jitne qarine saje hue hain

un ki jagah be-tartibi se paDe hue kuchh TukDe hote

mere jism ke TukDe kale jhuT ke is chalte aare ke niche

itne baDe nizam se meri ek neki Takra sakti thi

agar ek main hi sachcha hota