main saz DhunDti rahi

ehsās-e-avvalīñ

ek mauhūm iztirāb sā hai

ik talātum sā pech-o-tāb sā hai

umDe aate haiñ ḳhud-ba-ḳhud aañsū

dil pe qaabū na aañkh par qaabū

dil meñ ik dard mīThā mīThā sā

rañg chehre kā phīkā phīkā sā

zulf bikhrī huī pareshāñ-hāl

aap hī aap jī huā hai niDhāl

siine meñ ik chubhan sī hotī hai

āñkhoñ meñ kyuuñ jalan sī hotī hai

sar meñ pinhāñ tasavvur-e-mauhūm

haa.e ye ārzū-e-nā-mālūm

ek naala sā hai baġhair āvāz

ek halchal sī hai na soz na saaz

kyuuñ ye hālat hai be-qarārī kī

saañs bhī khul ke aa nahīñ saktī

ruuh meñ intishār sā kyā hai

dil ko ye intizār sā kyā hai

ehsas-e-awwalin

ek mauhum iztirab sa hai

ek talatum sa pech-o-tab sa hai

umDe aate hain KHud-ba-KHud aansu

dil pe qabu na aankh par qabu

dil mein ek dard miTha miTha sa

rang chehre ka phika phika sa

zulf bikhri hui pareshan-haal

aap hi aap ji hua hai niDhaal

sine mein ek chubhan si hoti hai

aankhon mein kyun jalan si hoti hai

sar mein pinhan tasawwur-e-mauhum

hae ye aarzu-e-na-malum

ek nala sa hai baghair aawaz

ek halchal si hai na soz na saz

kyun ye haalat hai be-qarari ki

sans bhi khul ke aa nahin sakti

ruh mein intishaar sa kya hai

dil ko ye intizar sa kya hai