nae sal ki pahli nazm

andeshoñ ke darvāzoñ par

koī nishān lagātā hai

aur rātoñ raat tamām gharoñ par

vahī siyāhī phir jaatī hai

dukh kā shab ḳhuuñ roz adhūrā rah jaatā hai

aur shanāḳht kā lamha bīttā jaatā hai

maiñ aur merā shahr-e-mohabbat

tārīkī kī chādar oḌhe

raushnī kī aahaT par kaan lagā.e kab se baiThe haiñ

ghoḌoñ kī Tāpoñ ko sunte rahte haiñ

had-e-samā.at se aage jaane vaalī āvāzoñ ke resham se

apnī rū-e-siyāh pe taare kāḌhte rahte haiñ

añgushtā ne ik ik kar ke chhalnī hone ko aa.e

ab baarī añgusht-e-shahādat kī aane vaalī hai

sub.h se pahle vo kaTne se bach jaa.e to!

andeshon ke darwazon par

koi nishan lagata hai

aur raaton raat tamam gharon par

wahi siyahi phir jati hai

dukh ka shab KHun roz adhura rah jata hai

aur shanaKHt ka lamha bitta jata hai

main aur mera shahr-e-mohabbat

tariki ki chadar oDhe

raushni ki aahaT par kan lagae kab se baiThe hain

ghoDon ki Tapon ko sunte rahte hain

had-e-samaat se aage jaane wali aawazon ke resham se

apni ru-e-siyah pe tare kaDhte rahte hain

angushta ne ek ek kar ke chhalni hone ko aae

ab bari angusht-e-shahadat ki aane wali hai

subh se pahle wo kaTne se bach jae to!