targhib

ye ek lamha jo apne hāthoñ meñ chāñd sūraj liye khaḌā hai

mujhe ishāroñ se kah rahā hai

vo mere ham-zād mere bhaa.ī

jo pattiyoñ kī tarah se kumhlā ke zard ho ke

tumhāre qadmoñ meñ aa gire haiñ

durīda yādoñ ke qāfile haiñ

vo mere hamnām mere sāthī

jo koñpaloñ kī tarah se phūTeñge

ḳhushbuoñ kī tarah chaleñge

na.e sarāboñ ke silsile haiñ

jo biit jaatā hai vo fanā hai

jo hone vaalā hai vo fanā hai

ye kyā ki tum āñsuoñ meñ Duube hue khaḌe ho

hazār bedār lazzatoñ ko ḳhirāj dene se Dar rahe ho

ye merī āñkhoñ haiñ merī āñkhoñ meñ

apnī āñkhoñ ke rañg bhar do

chalo mujhe lā-zavāl kar do

ye ek qatra jo zindagī ke samundaroñ se chhalak rahā hai

mirī shikastoñ kī ibtidā hai

ye ek lamha jo apne hathon mein chand suraj liye khaDa hai

mujhe ishaaron se kah raha hai

wo mere ham-zad mere bhai

jo pattiyon ki tarah se kumhla ke zard ho ke

tumhaare qadmon mein aa gire hain

durida yaadon ke qafile hain

wo mere hamnam mere sathi

jo konpalon ki tarah se phuTenge

KHushbuon ki tarah chalenge

nae sarabon ke silsile hain

jo bit jata hai wo fana hai

jo hone wala hai wo fana hai

ye kya ki tum aansuon mein Dube hue khaDe ho

hazar bedar lazzaton ko KHiraj dene se Dar rahe ho

ye meri aankhon hain meri aankhon mein

apni aankhon ke rang bhar do

chalo mujhe la-zawal kar do

ye ek qatra jo zindagi ke samundaron se chhalak raha hai

meri shikaston ki ibtida hai