tawahhum

un ke lahje meñ vo kuchh loch vo jhankār vo ras

ek be-qasd tarannum ke sivā kuchh bhī na thā

kāñpte hoñToñ meñ uljhe hue mub.ham fiqre

vo bhī andāz-e-takallum ke sivā kuchh bhī na thā

saikḌoñ Tīseñ nazar aatī thiiñ jis meñ mujh ko

vo bhī ik saada tabassum ke sivā kuchh bhī na thā

sard o tābinda sī peshānī vo machle hue ashk

din meñ nūr-e-mah-o-anjum ke sivā kuchh bhī na thā

tund aahoñ ke dabāne meñ vo siine kā ubhār

ek yūñhī se talātum ke sivā kuchh bhī na thā

maiñ ne jo dekhā thaa, jo sochā thaa, jo samjhā thā

haa.e 'jazbī' vo tavahhum ke sivā kuchh bhī na thā

un ke lahje mein wo kuchh loch wo jhankar wo ras

ek be-qasd tarannum ke siwa kuchh bhi na tha

kanpte honTon mein uljhe hue mubham fiqre

wo bhi andaz-e-takallum ke siwa kuchh bhi na tha

saikDon Tisen nazar aati thin jis mein mujh ko

wo bhi ek sada tabassum ke siwa kuchh bhi na tha

sard o tabinda si peshani wo machle hue ashk

din mein nur-e-mah-o-anjum ke siwa kuchh bhi na tha

tund aahon ke dabane mein wo sine ka ubhaar

ek yunhi se talatum ke siwa kuchh bhi na tha

main ne jo dekha tha, jo socha tha, jo samjha tha

hae 'jazbi' wo tawahhum ke siwa kuchh bhi na tha