apne rahne ka Thikana aur hai

apne rahne kā Thikānā aur hai

ye qafas ye āshiyānā aur hai

maut kā aanā bhī dekhā bār-hā

par kisī par dil kā aanā aur hai

naaz uThāne ko uThāte haiñ sabhī

apne dil kā naaz uThānā aur hai

dard-e-dil sun kar tumheñ niiñd aa chukī

banda-parvar ye fasānā aur hai

raat bhar meñ sham-e-mahfil jal-bujhī

āshiqoñ kā dil jalānā aur hai

ham kahāñ phir bāġhbāñ gulshan kahāñ

ek do din āb-o-dānā aur hai

bholī bholī un kī bāteñ ho chukīñ

ab ḳhudā rakkhe zamānā aur hai

chhoḌ duuñ kyūñkar dar-e-pīr-e-muġhāñ

koī aisā āstānā aur hai

yār-e-sādiq DhūñDte ho tum 'jalīl'

mushfiq-e-man ye zamānā aur hai

apne rahne ka Thikana aur hai

ye qafas ye aashiyana aur hai

maut ka aana bhi dekha bar-ha

par kisi par dil ka aana aur hai

naz uThane ko uThate hain sabhi

apne dil ka naz uThana aur hai

dard-e-dil sun kar tumhein nind aa chuki

banda-parwar ye fasana aur hai

raat bhar mein sham-e-mahfil jal-bujhi

aashiqon ka dil jalana aur hai

hum kahan phir baghban gulshan kahan

ek do din aab-o-dana aur hai

bholi bholi un ki baaten ho chukin

ab KHuda rakkhe zamana aur hai

chhoD dun kyunkar dar-e-pir-e-mughan

koi aisa aastana aur hai

yar-e-sadiq DhunDte ho tum 'jalil'

mushfiq-e-man ye zamana aur hai