dil pareshan hua jata hai

dil pareshān huā jaatā hai

aur sāmān huā jaatā hai

ḳhidmat-e-pīr-e-muġhāñ kar zāhid

tū ab insān huā jaatā hai

maut se pahle mujhe qatl karo

us kā ehsān huā jaatā hai

lazzat-e-ishq ilāhī miT jaa.e

dard armān huā jaatā hai

dam zarā lo ki mirā dam tum par

abhī qurbān huā jaatā hai

girya kyā zabt karūñ ai nāseh

ashk paimān huā jaatā hai

bevafā.ī se bhī rafta rafta

vo mirī jaan huā jaatā hai

arsa-e-hashr meñ vo aa pahuñche

saaf maidān huā jaatā hai

madad ai himmat-e-dushvār-pasañd

kaam āsān huā jaatā hai

chhā.ī jaatī hai ye vahshat kaisī

ghar bayābān huā jaatā hai

shikva sun aañkh milā kar zālim

kyuuñ pashemān huā jaatā hai

ātish-e-shauq bujhī jaatī hai

ḳhaak armān huā jaatā hai

uzr jaane meñ na kar ai qāsid

tū bhī nādān huā jaatā hai

muztarib kyuuñ na hoñ armāñ dil meñ

qaid mehmān huā jaatā hai

'dāġh' ḳhāmosh na lag jaa.e nazar

sher dīvān huā jaatā hai

dil pareshan hua jata hai

aur saman hua jata hai

KHidmat-e-pir-e-mughan kar zahid

tu ab insan hua jata hai

maut se pahle mujhe qatl karo

us ka ehsan hua jata hai

lazzat-e-ishq ilahi miT jae

dard arman hua jata hai

dam zara lo ki mera dam tum par

abhi qurban hua jata hai

girya kya zabt karun ai naseh

ashk paiman hua jata hai

bewafai se bhi rafta rafta

wo meri jaan hua jata hai

arsa-e-hashr mein wo aa pahunche

saf maidan hua jata hai

madad ai himmat-e-dushwar-pasand

kaam aasan hua jata hai

chhai jati hai ye wahshat kaisi

ghar bayaban hua jata hai

shikwa sun aankh mila kar zalim

kyun pasheman hua jata hai

aatish-e-shauq bujhi jati hai

KHak arman hua jata hai

uzr jaane mein na kar ai qasid

tu bhi nadan hua jata hai

muztarib kyun na hon arman dil mein

qaid mehman hua jata hai

'dagh' KHamosh na lag jae nazar

sher diwan hua jata hai