main to samjha tha jis waqt mujhko wo milenge to jannat milegi

maiñ to samjhā thā jis vaqt mujh ko vo mileñge to jannat milegī

kyā ḳhabar thī rah-e-āshiqī meñ saath un ke qayāmat milegī

maiñ nahīñ jāntā thā ki mujh ko ye mohabbat kī qīmat milegī

āñsuoñ kā ḳhazāna milegā chaak dāman kī daulat milegī

phuul samjhe na the zindagānī is qadar ḳhūb-sūrat milegī

ashk ban kar tabassum milegā dard ban kar masarrat milegī

merī rusvā.iyoñ pe na ḳhush ho merī dīvāngī ko duā do

tum ko jitnī bhī shohrat milegī sirf merī badaulat milegī

dil hamārā na toḌo ḳhudā-rā varna kho doge apnā sahārā

zarre zarre meñ is aa.ine ke tum ko apnī hī sūrat milegī

un ke ruḳh se naqāb aaj uThegī ab nazāroñ kī merāj hogī

ek muddat se aaj ahl-e-ġham ko muskurāne kī mohlat milegī

kaise sābit-qadam vo rahegā us kī tauba kā kyā haal hogā

jis ko sunte haiñ shaiḳh-e-haram se mai-kashī kī ijāzat milegī

main to samjha tha jis waqt mujh ko wo milenge to jannat milegi

kya KHabar thi rah-e-ashiqi mein sath un ke qayamat milegi

main nahin jaanta tha ki mujh ko ye mohabbat ki qimat milegi

aansuon ka KHazana milega chaak daman ki daulat milegi

phul samjhe na the zindagani is qadar KHub-surat milegi

ashk ban kar tabassum milega dard ban kar masarrat milegi

meri ruswaiyon pe na KHush ho meri diwangi ko dua do

tum ko jitni bhi shohrat milegi sirf meri badaulat milegi

dil hamara na toDo KHuda-ra warna kho doge apna sahaara

zarre zarre mein is aaine ke tum ko apni hi surat milegi

un ke ruKH se naqab aaj uThegi ab nazaron ki meraj hogi

ek muddat se aaj ahl-e-gham ko muskurane ki mohlat milegi

kaise sabit-qadam wo rahega us ki tauba ka kya haal hoga

jis ko sunte hain shaiKH-e-haram se mai-kashi ki ijazat milegi