rone se jo bhaDas thi dil ki nikal gai

rone se jo bhaḌās thī dil kī nikal ga.ī

aañsū bahā.e chaar tabī.at sambhal ga.ī

maiñ ne taras taras ke guzārī hai saarī umr

merī na hogī jaan jo hasrat nikal ga.ī

bechain huuñ maiñ jab se nahīñ dil-lagī kahīñ

vo dard kyā gayā ki mire dil kī kal ga.ī

kahtā hai chārāgar ki na pā.egā indimāl

achchhā huā ki zaḳhm kī sūrat badal ga.ī

ai sham.a ham se soz-e-mohabbat ke zabt siikh

kam-baḳht ek raat meñ saarī pighal ga.ī

shāḳh-e-nihāl-e-umr hamārī na phal sakī

ye to hai vo kalī jo nikalte hī jal ga.ī

dekhā jo us ne pyaar se aġhyār kī taraf

'shā.ir' qasam ḳhudā kī mirī jaan jal ga.ī

rone se jo bhaDas thi dil ki nikal gai

aansu bahae chaar tabiat sambhal gai

main ne taras taras ke guzari hai sari umr

meri na hogi jaan jo hasrat nikal gai

bechain hun main jab se nahin dil-lagi kahin

wo dard kya gaya ki mere dil ki kal gai

kahta hai chaaragar ki na paega indimal

achchha hua ki zaKHm ki surat badal gai

ai shama hum se soz-e-mohabbat ke zabt sikh

kam-baKHt ek raat mein sari pighal gai

shaKH-e-nihaal-e-umr hamari na phal saki

ye to hai wo kali jo nikalte hi jal gai

dekha jo us ne pyar se aghyar ki taraf

'shair' qasam KHuda ki meri jaan jal gai