zaKHm dabe to phir naya tir chala diya karo

zaḳhm dabe to phir nayā tiir chalā diyā karo

dosto apnā lutf-e-ḳhās yaad dilā diyā karo

ek ilāj-e-dā.imī hai to barā-e-tishnagī

pahle hī ghūñT meñ agar zahr milā diyā karo

shahr talab kare agar tum se ilāj-e-tīragī

sāhab-e-iḳhtiyār ho aag lagā diyā karo

maqtal-e-ġham kī raunaqeñ ḳhatm na hone pā.eñgī

koī to aa hī jā.egā roz sadā diyā karo

jazba-e-ḳhāk-parvarī aur sukūn pā.egā

ḳhaak karo hameñ to phir ḳhaak uḌā diyā karo

zaKHm dabe to phir naya tir chala diya karo

dosto apna lutf-e-KHas yaad dila diya karo

ek ilaj-e-daimi hai to bara-e-tishnagi

pahle hi ghunT mein agar zahr mila diya karo

shahr talab kare agar tum se ilaj-e-tiragi

sahab-e-iKHtiyar ho aag laga diya karo

maqtal-e-gham ki raunaqen KHatm na hone paengi

koi to aa hi jaega roz sada diya karo

jazba-e-KHak-parwari aur sukun paega

KHak karo hamein to phir KHak uDa diya karo