apne jalne meñ kisī ko nahīñ karte haiñ sharīk

raat ho jaa.e to ham sham.a bujhā dete haiñ

apne jalne mein kisi ko nahin karte hain sharik

raat ho jae to hum shama bujha dete hain

ik roz chhīn legī hamīñ se zamīñ hameñ

chhīneñge kyā zamīñ ke ḳhazāne zamīñ se ham

ek roz chhin legi hamin se zamin hamein

chhinenge kya zamin ke KHazane zamin se hum

samjhegā aadmī ko vahāñ kaun aadmī

banda jahāñ ḳhudā ko ḳhudā māntā nahīñ

samjhega aadmi ko wahan kaun aadmi

banda jahan KHuda ko KHuda manta nahin

ġhalat-fahmiyoñ meñ javānī guzārī

kabhī vo na samjhe kabhī ham na samjhe

ghalat-fahmiyon mein jawani guzari

kabhi wo na samjhe kabhi hum na samjhe

aap ke lab pe aur vafā kī qasam

kyā qasam khaa.ī hai ḳhudā kī qasam

aap ke lab pe aur wafa ki qasam

kya qasam khai hai KHuda ki qasam

sau baar jis ko dekh ke hairān ho chuke

jī chāhtā hai phir use ik baar dekhnā

sau bar jis ko dekh ke hairan ho chuke

ji chahta hai phir use ek bar dekhna

kab tak najāt pā.eñge vahm o yaqīñ se ham

uljhe hue haiñ aaj bhī duniyā o diiñ se ham

kab tak najat paenge wahm o yaqin se hum

uljhe hue hain aaj bhi duniya o din se hum

achchhā huā ki sab dar-o-dīvār gir paḌe

ab raushnī to hai mire ghar meñ havā to hai

achchha hua ki sab dar-o-diwar gir paDe

ab raushni to hai mere ghar mein hawa to hai

ā.īna kaisā thā vo shām-e-shakebā.ī kā

sāmnā kar na sakā apnī hī bīnā.ī kā

aaina kaisa tha wo sham-e-shakebai ka

samna kar na saka apni hi binai ka

aisā bhī koī ġham hai jo tum se nahīñ paayā

aisā bhī koī dard hai jo dil meñ nahīñ hai

aisa bhi koi gham hai jo tum se nahin paya

aisa bhi koi dard hai jo dil mein nahin hai

raushnī ḳhud bhī charāġhoñ se alag rahtī hai

dil meñ jo rahte haiñ vo dil nahīñ hone paate

raushni KHud bhi charaghon se alag rahti hai

dil mein jo rahte hain wo dil nahin hone pate

ġham-e-daurāñ ko baḌī chiiz samajh rakkhā thā

kaam jab tak na paḌā thā ġham-e-jānāñ se hameñ

gham-e-dauran ko baDi chiz samajh rakkha tha

kaam jab tak na paDa tha gham-e-jaanan se hamein

ḳhvāhishoñ ne dil ko tasvīr-e-tamannā kar diyā

ik nazar ne aa.ine meñ aks gahrā kar diyā

KHwahishon ne dil ko taswir-e-tamanna kar diya

ek nazar ne aaine mein aks gahra kar diya

ishq aatā na agar rāh-numā.ī ke liye

aap bhī vāqif-e-manzil nahīñ hone paate

ishq aata na agar rah-numai ke liye

aap bhi waqif-e-manzil nahin hone pate

kamāl-e-zabt meñ yuuñ ashk-e-muztar TuuT kar niklā

asīr-e-ġham koī zindāñ se jaise chhūT kar niklā

kamal-e-zabt mein yun ashk-e-muztar TuT kar nikla

asir-e-gham koi zindan se jaise chhuT kar nikla

kab tak yaqīn ishq hameñ ḳhud na aa.egā

kab tak makāñ kā haal kaheñge makīñ se ham

kab tak yaqin ishq hamein KHud na aaega

kab tak makan ka haal kahenge makin se hum

azal se aaj tak sajde kiye aur ye nahīñ sochā

kisī kā āstāñ kyuuñ hai kisī kā sañg-e-dar kyā hai

azal se aaj tak sajde kiye aur ye nahin socha

kisi ka aastan kyun hai kisi ka sang-e-dar kya hai

ravāñ hai qāfila-e-rūh-e-iltifāt abhī

hamārī raah se haT jaa.e kā.enāt abhī

rawan hai qafila-e-ruh-e-iltifat abhi

hamari rah se haT jae kaenat abhi

ga.e the naqd-e-girāñ-māya-e-ḳhulūs ke saath

ḳharīd laa.e haiñ sastī adāvateñ kyā kyā

gae the naqd-e-giran-maya-e-KHulus ke sath

KHarid lae hain sasti adawaten kya kya

jab ishq thā to dil kā ujālā thā dahr meñ

koī charāġh nūr-badāmāñ nahīñ hai ab

jab ishq tha to dil ka ujala tha dahr mein

koi charagh nur-badaman nahin hai ab