دیر سے گونجتے ہیں سناٹے

جیسے ہم کو پکارتا ہے کوئی

زندگی یوں ہوئی بسر تنہا

قافلہ ساتھ اور سفر تنہا

ہاتھ چھوٹیں بھی تو رشتے نہیں چھوڑا کرتے

وقت کی شاخ سے لمحے نہیں توڑا کرتے

شام سے آنکھ میں نمی سی ہے

آج پھر آپ کی کمی سی ہے

کبھی تو چونک کے دیکھے کوئی ہماری طرف

کسی کی آنکھ میں ہم کو بھی انتظار دکھے

کتنی لمبی خاموشی سے گزرا ہوں

ان سے کتنا کچھ کہنے کی کوشش کی

وقت رہتا نہیں کہیں ٹک کر

عادت اس کی بھی آدمی سی ہے

خوشبو جیسے لوگ ملے افسانے میں

ایک پرانا خط کھولا انجانے میں

عادتاً تم نے کر دیے وعدے

عادتاً ہم نے اعتبار کیا

بھرے ہیں رات کے ریزے کچھ ایسے آنکھوں میں

اجالا ہو تو ہم آنکھیں جھپکتے رہتے ہیں

دن کچھ ایسے گزارتا ہے کوئی

جیسے احساں اتارتا ہے کوئی

چند امیدیں نچوڑی تھیں تو آہیں ٹپکیں

دل کو پگھلائیں تو ہو سکتا ہے سانسیں نکلیں

اپنے ماضی کی جستجو میں بہار

پیلے پتے تلاش کرتی ہے

یہ شکر ہے کہ مرے پاس تیرا غم تو رہا

وگرنہ زندگی بھر کو رلا دیا ہوتا

جب بھی یہ دل اداس ہوتا ہے

جانے کون آس پاس ہوتا ہے

رکے رکے سے قدم رک کے بار بار چلے

قرار دے کے ترے در سے بے قرار چلے

آپ کے بعد ہر گھڑی ہم نے

آپ کے ساتھ ہی گزاری ہے

تمہارے خواب سے ہر شب لپٹ کے سوتے ہیں

سزائیں بھیج دو ہم نے خطائیں بھیجی ہیں

جس کی آنکھوں میں کٹی تھیں صدیاں

اس نے صدیوں کی جدائی دی ہے

ہم نے اکثر تمہاری راہوں میں

رک کر اپنا ہی انتظار کیا