عشق میں کیا نقصان نفع ہے ہم کو کیا سمجھاتے ہو

ہم نے ساری عمر ہی یارو دل کا کاروبار کیا

اب یہ بھی نہیں ٹھیک کہ ہر درد مٹا دیں

کچھ درد کلیجے سے لگانے کے لیے ہیں

آج تو مل کے بھی جیسے نہ ملے ہوں تجھ سے

چونک اٹھتے تھے کبھی تیری ملاقات سے ہم

آنکھیں جو اٹھائے تو محبت کا گماں ہو

نظروں کو جھکائے تو شکایت سی لگے ہے

آنکھوں میں جو بھر لوگے تو کانٹوں سے چبھیں گے

یہ خواب تو پلکوں پہ سجانے کے لیے ہیں

گزر گیا ہے کوئی لمحۂ شرر کی طرح

ابھی تو میں اسے پہچان بھی نہ پایا تھا

معاف کر نہ سکی میری زندگی مجھ کو

وہ ایک لمحہ کہ میں تجھ سے تنگ آیا تھا

شرم آتی ہے کہ اس شہر میں ہم ہیں کہ جہاں

نہ ملے بھیک تو لاکھوں کا گزارا ہی نہ ہو

دیکھوں ترے ہاتھوں کو تو لگتا ہے ترے ہاتھ

مندر میں فقط دیپ جلانے کے لیے ہیں

ہم سے پوچھو کہ غزل کیا ہے غزل کا فن کیا

چند لفظوں میں کوئی آگ چھپا دی جائے

فرصت کار فقط چار گھڑی ہے یارو

یہ نہ سوچو کی ابھی عمر پڑی ہے یارو

اشعار مرے یوں تو زمانے کے لیے ہیں

کچھ شعر فقط ان کو سنانے کے لیے ہیں

مانا کہ رنگ رنگ ترا پیرہن بھی ہے

پر اس میں کچھ کرشمہ عکس بدن بھی ہے

میں جب بھی اس کے خیالوں میں کھو سا جاتا ہوں

وہ خود بھی بات کرے تو برا لگے ہے مجھے

دلی کہاں گئیں ترے کوچوں کی رونقیں

گلیوں سے سر جھکا کے گزرنے لگا ہوں میں

تمام عمر عذابوں کا سلسلہ تو رہا

یہ کم نہیں ہمیں جینے کا حوصلہ تو رہا

جب لگیں زخم تو قاتل کو دعا دی جائے

ہے یہی رسم تو یہ رسم اٹھا دی جائے

ہر چند اعتبار میں دھوکے بھی ہیں مگر

یہ تو نہیں کسی پہ بھروسا کیا نہ جائے

آہٹ سی کوئی آئے تو لگتا ہے کہ تم ہو

سایہ کوئی لہرائے تو لگتا ہے کہ تم ہو

ایک بھی خواب نہ ہو جن میں وہ آنکھیں کیا ہیں

اک نہ اک خواب تو آنکھوں میں بساؤ یارو

سو چاند بھی چمکیں گے تو کیا بات بنے گی

تم آئے تو اس رات کی اوقات بنے گی

دل کو ہر لمحہ بچاتے رہے جذبات سے ہم

اتنے مجبور رہے ہیں کبھی حالات سے ہم

قوت تعمیر تھی کیسی خس و خاشاک میں

آندھیاں چلتی رہیں اور آشیاں بنتا گیا

کیا پتا ہو بھی سکے اس کی تلافی کہ نہیں

شاعری تجھ کو گنوایا ہے بہت دن ہم نے

یہ علم کا سودا یہ رسالے یہ کتابیں

اک شخص کی یادوں کو بھلانے کے لیے ہیں

تجھے بانہوں میں بھر لینے کی خواہش یوں ابھرتی ہے

کہ میں اپنی نظر میں آپ رسوا ہو سا جاتا ہوں

کچل کے پھینک دو آنکھوں میں خواب جتنے ہیں

اسی سبب سے ہیں ہم پر عذاب جتنے ہیں

اتنے مایوس تو حالات نہیں

لوگ کس واسطے گھبرائے ہیں

انقلابوں کی گھڑی ہے

ہر نہیں ہاں سے بڑی ہے

اور کیا اس سے زیادہ کوئی نرمی برتوں

دل کے زخموں کو چھوا ہے ترے گالوں کی طرح

لوگ کہتے ہیں کہ تو اب بھی خفا ہے مجھ سے

تیری آنکھوں نے تو کچھ اور کہا ہے مجھ سے

زلفیں سینہ ناف کمر

ایک ندی میں کتنے بھنور