میں خود میں گونجتا ہوں بن کے تیرا سناٹا

مجھے نہ دیکھ مری طرح بے زباں بن کر

کسی کے ساتھ نہ ہونے کے دکھ بھی جھیلے ہیں

کسی کے ساتھ مگر اور بھی اکیلے ہیں

شکایت اور تو کچھ بھی نہیں ان آنکھوں سے

ذرا سی بات پہ پانی بہت برستا ہے

دنیا میری زندگی کے دن کم کرتی جاتی ہے کیوں

خون پسینہ ایک کیا ہے یہ میری مزدوری ہے

ہم کئی روز سے بے وجہ بہت خوش ہیں چلو

زندگی کی یہ ادائیں بھی تو دیکھی جائیں

کوئی جس بات سے خوش ہے تو خفا دوسرا ہے

کچھ بھی کہنے میں کسی سے یہی دشواری ہے

بارہا خود پہ میں حیران بہت ہوتا ہوں

کوئی ہے مجھ میں جو بالکل ہی جدا ہے مجھ سے

یہ تلخؔ کیا کیا ہے خود سے بھی گئے تم تو

مرنا ہی کسی پر تھا تم خود پہ مرے ہوتے

ہر شکل رفتہ رفتہ انجان ہو گئی ہے

مشکل تھی جو بھی جس کی آسان ہو گئی ہے

یہ دل اب مجھ سے تھوڑی دیر سستانے کو کہتا ہے

اور آنکھیں موند کر ہر بات دہرانے کو کہتا ہے

سب کے سو جانے پہ افلاک سے کیا کہتا ہے

رات کو ایک پرندے کی صدا سنتا ہوں

یہ اب گھروں میں نہ پانی نہ دھوپ ہے نہ جگہ

زمیں نے تلخؔ یہ شہروں کو بد دعا دی ہے

ثابت یہ میں کروں گا کہ ہوں یا نہیں ہوں میں

وہم و یقیں کا کوئی دوراہا نہیں ہوں میں

از روز ازل ہے کہ نہیں ہے کا ہے محشر

اور اس کا جواب آج بھی ہاں بھی ہے نہیں بھی