دلوں کا حال تو یہ ہے کہ ربط ہے نہ گریز

محبتیں تو گئیں تھی عداوتیں بھی گئیں

موت کے بعد زیست کی بحث میں مبتلا تھے لوگ

ہم تو سحرؔ گزر گئے تہمت زندگی اٹھائے

جانے کیوں رنگ بغاوت نہیں چھپنے پاتا

ہم تو خاموش بھی ہیں سر بھی جھکائے ہوئے ہیں

صدا اپنی روش اہل زمانہ یاد رکھتے ہیں

حقیقت بھول جاتے ہیں فسانہ یاد رکھتے ہیں

عجیب ہوتے ہیں آداب رخصت محفل

کہ وہ بھی اٹھ کے گیا جس کا گھر نہ تھا کوئی

کیسی کیسی محفلیں سونی ہوئیں

پھر بھی دنیا کس قدر آباد ہے

نہ اب وہ شدت آوارگی نہ وحشت دل

ہمارے نام کی کچھ اور شہرتیں بھی گئیں

مرے لہو کو مری خاک ناگزیر کو دیکھ

یونہی سلیقۂ عرض ہنر نہیں آیا

شاید کہ وہ واقف نہیں آداب سفر سے

پانی میں جو قدموں کے نشاں ڈھونڈ رہا تھا

محفل آرائی ہماری نہیں افراط کا نام

کوئی ہو یا کہ نہ ہو آپ تو آئے ہوئے ہیں

یہ مرنا جینا بھی شاید مجبوری کی دو لہریں ہیں

کچھ سوچ کے مرنا چاہا تھا کچھ سوچ کے جینا چاہا ہے

تری آرزو سے بھی کیوں نہیں غم زندگی میں کوئی کمی

یہ سوال وہ ہے کہ جس کا اب کوئی اک جواب نہیں رہا

تنگ آتے بھی نہیں کشمکش دہر سے لوگ

کیا تماشا ہے کہ مرتے بھی نہیں زہر سے لوگ

ہم کو جنت کی فضا سے بھی زیادہ ہے عزیز

یہی بے رنگ سی دنیا یہی بے مہر سے لوگ

شکوۂ تلخئ حالات بجا ہے لیکن

اس پہ روتا ہوں کہ میں نے بھی رلایا ہے تجھے

جسے گزار گئے ہم بڑے ہنر کے ساتھ

وہ زندگی تھی ہماری ہنر نہ تھا کوئی