باپ زینہ ہے جو لے جاتا ہے اونچائی تک

ماں دعا ہے جو سدا سایہ فگن رہتی ہے

اس گئے سال بڑے ظلم ہوئے ہیں مجھ پر

اے نئے سال مسیحا کی طرح مل مجھ سے

بے صدا سی کسی آواز کے پیچھے پیچھے

چلتے چلتے میں بہت دور نکل جاتا ہوں

خدا کرے کہ وہی بات اس کے دل میں ہو

جو بات کہنے کی ہمت جٹا رہا ہوں میں

ہم اپنے شہر سے ہو کر اداس آئے تھے

تمہارے شہر سے ہو کر اداس جانا تھا

سفر کہاں سے کہاں تک پہنچ گیا میرا

رکے جو پاؤں تو کاندھوں پہ جا رہا ہوں میں

عشق ادب ہے تو اپنے آپ آئے

گر سبق ہے تو پھر پڑھا مجھ کو

تمہارے سچ کی حفاظت میں یوں ہوا اکثر

کہ اپنے آپ کو جھوٹا بنا لیا میں نے

بدن سرائے میں ٹھہرا ہوا مسافر ہوں

چکا رہا ہوں کرایہ میں چند سانسوں کا

وہ کوئی عام سا ہی جملہ تھا

تیرے منہ سے برا لگا مجھ کو

مرے بغیر کوئی تم کو ڈھونڈتا کیسے

تمہیں پتہ ہے تمہارا پتہ رہا ہوں میں

کتنا دشوار ہے اک لمحہ بھی اپنا ہونا

اس کو ضد ہے کہ میں ہر حال میں اس کا ہو جاؤں

آئینہ چپکے سے منظر وہ چرا لیتا ہے

تو سجاتا ہے بدن جب کبھی عریانی سے