اک لہو کی بوند تھی لیکن کئی آنکھوں میں تھی

ایک حرف معتبر تھا اور کئی معنوں میں تھا

ایک بے چین سمندر ہے مرے جسم میں قید

ٹوٹ جائے جو یہ دیوار تو منظر دیکھوں

ہمارے نام لکھی جا چکی تھی رسوائی

ہمیں تو ہونا تھا یوں بھی خراب چاروں طرف

خود پہ کیا بیت گئی اتنے دنوں میں تجھ بن

یہ بھی ہمت نہیں اب جھانک کے اندر دیکھوں

ناخدا ہو کہ خدا دیکھتے رہ جاتے ہیں

کشتیاں ڈوبتی ہیں اس کے مکیں ڈوبتے ہیں

میں وہ ٹوٹا ہوا تارا جسے محفل نہ راس آئی

میں وہ شعلہ جو شب بھر آنکھ کے پانی میں رہتا ہے

میں نے ہنسنے کی اذیت جھیل لی رویا نہیں

یہ سلیقہ بھی کوئی آسان جینے کا نہ تھا

اٹھے ہیں ہاتھ تو اپنے کرم کی لاج بچا

وگرنہ میری دعا کیا مری طلب کیا ہے