یہ مانا شیشۂ دل رونق بازار الفت ہے

مگر جب ٹوٹ جاتا ہے تو قیمت اور ہوتی ہے

پہچان لو اس کو وہی قاتل ہے ہمارا

جس ہاتھ میں ٹوٹی ہوئی تلوار لگے ہے

رہنا تم چاہے جہاں خبروں میں آتے رہنا

ہم کو احساس جدائی سے بچاتے رہنا

وہ تو کہئے آج بھی زنجیر میں جھنکار ہے

ورنہ کس کو یاد رہ جاتی ہے دیوانوں کی بات

اس دور کی تخلیق بھی کیا شیشہ گری ہے

ہر آئینے میں آدمی الٹا نظر آئے

جب پرانا لہجہ کھو دیتا ہے اپنی تازگی

اک نئی طرز نوا ایجاد کر لیتے ہیں ہم

کون سنتا ہے بھکاری کی صدائیں اس لیے

کچھ ظریفانہ لطیفے یاد کر لیتے ہیں ہم

یہ ہم کو چھوڑ کے تنہا کہاں چلے وامقؔ

ابھی تو منزل معراج دار باقی ہے

تم ہوش میں جب آئے تو آفت ہی بن کے آئے

اب میرے پاس جب بھی تم آؤ نشے میں آؤ

ہم نہ کہتے تھے شاعری ہے وبال

آج لو گھر گئے حسینوں میں

اگر غبار ہو دل میں اگر ہو تنگ نظر

تو مہر و ماہ سے بھی تیرگی نہیں جاتی

اے کاش مرے گوش و نظر بھی رہیں ثابت

جب حسن سنا جائے یا نغمہ نظر آئے

دیکھیے کب راہ پر ٹھیک سے اٹھیں قدم

رات کی مے کا خمار دیکھیے کب تک رہے

ارے او ادیب فسردہ خو ارے او مغنی رنگ و بو

ابھی حاشیے پہ کھڑا ہے تو بہت آگے اہل ہنر گئے

ہم کو حاجت نہیں نقیبوں کی

شعر اپنا نقیب ہے خود ہی

نہ پوچھو بے بسی اس تشنہ لب کی

کہ جس کی دسترس میں جام بھی ہے

بدلتی رہتی ہیں قدریں رحیل وقت کے ساتھ

زمانہ بدلے گا ہر شے کا نام بدلے گا

ہے جس کی ٹھوکروں میں آب زندگی وامقؔ

وہ تشنگی کا سمندر دکھائی دیتا ہے

مرے فکر و فن کو نئی فضا نئے بال و پر کی تلاش ہے

جو قفس کو یاس کے پھونک دے مجھے اس شرر کی تلاش ہے

لے کے تیشہ اٹھا ہے پھر مزدور

ڈھل رہے ہیں جبل مشینوں میں

یقیناً آ گیا ہے مے کدے میں تشنہ لب کوئی

کہ پیتا جا رہا ہوں کیفیت کم ہوتی جاتی ہے

کس نے بسایا تھا اور ان کو کس نے یوں برباد کیا

اپنے لہو کی بو آتی ہے ان اجڑے بازاروں سے

میں تنگ ہوں سکون سے اب اضطراب دے

بے انتہا سکون بھی آزار ہی تو ہے

اک حلقۂ احباب ہے تنہائی بھی اس کی

اک ہم ہیں کہ ہر بزم میں تنہا نظر آئے

وہ جو تسبیح لیے ہے اس کو

میرے آگے سے اٹھا دے ساقی

وہ لمحہ بھر کی ملی خلد میں جو آزادی

تو قید ہو گئے مٹی میں ہم سدا کے لیے

زباں تک جو نہ آئے وہ محبت اور ہوتی ہے

فسانہ اور ہوتا ہے حقیقت اور ہوتی ہے

مجھے اس جنوں کی ہے جستجو جو چمن کو بخش دے رنگ و بو

جو نوید فصل بہار ہو مجھے اس نظر کی تلاش ہے

نہیں ملتے تو اک ادنیٰ شکایت ہے نہ ملنے کی

مگر مل کر نہ ملنے کی شکایت اور ہوتی ہے

رات بھی مرجھا چلی چاند بھی کمھلا گیا

پھر بھی ترا انتظار دیکھیے کب تک رہے

وہ وعدے یاد نہیں تشنہ ہے مگر اب تک

وہ وعدے بھی کوئی وعدے جو مے پلا کے لیے

محبت کی سزا ترک محبت

محبت کا یہی انعام بھی ہے

تیری قسمت ہی میں زاہد مئے نہیں

شکر تو مجبوریوں کا نام ہے

یہ زندگی کی رات ہے تاریک کس قدر

دونوں سروں پہ شمع جلاؤ نشے میں آؤ

پی لیا کرتے ہیں جینے کی تمنا میں کبھی

لڑکھڑانا بھی ضروری ہے سنبھلنے کے لیے

لاکھ آباد تمنا ہو کے دل

پھر بھی ویراں ہے نہ جانے کس لیے

اسے ضد کہ وامقؔ شکوہ گر کسی راز سے نہ ہو با خبر

مجھے ناز ہے کہ یہ دیدہ ور مری عمر بھر کی تلاش ہے

ہارنے جیتنے سے کچھ نہیں ہوتا وامقؔ

کھیل ہر سانس پہ ہے داؤں لگاتے رہنا

سرکشی خودکشی پہ ختم ہوئی

ایک رسی تھی جل گئی شاید