لطف تو دیتی ہے یہ آوارگی

پھر بھی ہم کو لوٹ جانا چاہئے

تجھے جب دیکھتا ہوں تو خود اپنی یاد آتی ہے

مرا انداز ہنسنے کا کبھی تیرے ہی جیسا تھا

ہم نے تو پاس ادب میں بندہ پرور کہہ دیا

اور وہ سمجھے کہ سچ میں بندہ پرور ہو گئے

اول آخر ہی جب نہیں بس میں

کیا کریں درمیان کی باتیں

کتنی عجلت میں مٹا ڈالا گیا

آگ میں سب کچھ جلا ڈالا گیا

اب تک جسم سلگتا ہے

کیسی تھی برسات نہ پوچھ

ہم چراغوں کی مدد کرتے رہے

اور ادھر سورج بجھا ڈالا گیا

زمانے سے گھبرا کے سمٹے تھے خود میں

مگر اب تو خود سے بھی اکتا رہے ہیں

وقت کہاں مٹھی میں آنے والا تھا

لیکن ہم نے باندھ لیا تصویروں میں

اب اپنا چہرہ بیگانہ لگتا ہے

ہم کو تھی سنجیدہ رہنے کی عادت

سیدھے اپنی بات پہ آ

یہ لہجہ درباری چھوڑ

مرے دل میں کوئی معصوم بچہ

کسی سے آج تک روٹھا ہوا ہے

سنا ہے رات پورے چاند کی ہے

سمندر شام سے بہکا ہوا ہے

کسی کے عشق میں برباد ہونا

ہمیں آیا نہیں فرہاد ہونا

کاغذوں پر مفلسی کے مورچے سر ہو گئے

اور کہنے کے لئے حالات بہتر ہو گئے

کوئی تعمیر کی صورت تو نکلے

ہمیں منظور ہے بنیاد ہونا

چند لکیریں تو اس درجہ گہری تھیں

دیکھنے والا ڈوب گیا تصویروں میں

سفر میں اب مسلسل زلزلے ہیں

وہ رک جائیں جنہیں گرنے کا ڈر ہے

بتاؤں کیا تمہیں حاصل سفر کا

ادھوری داستاں ہے اور میں ہوں

بات کرنے کا حسیں طور طریقہ سیکھا

ہم نے اردو کے بہانے سے سلیقہ سیکھا

اسی نے راہ دکھلائی جہاں کو

جو اپنی راہ پر تنہا گیا تھا

آخر ہم کو بے زاری تک لے آئی

ہر شے پر گرویدہ رہنے کی عادت

مری آوارگی ہی میرے ہونے کی علامت ہے

مجھے پھر اس سفر کے بعد بھی کوئی سفر دینا

کتنے لوگوں سے ملنا جلنا تھا

خود سے ملنا بھی اب محال ہوا

دل کا سارا درد بھرا تصویروں میں

ایک مصور نقش ہوا تصویروں میں

زندگی دیکھ لے نظر بھر کے

ہم ہیں شامل ترے خرابوں میں

میں تھا جب کارواں کے ساتھ تو گل زار تھی دنیا

مگر تنہا ہوا تو ہر طرف صحرا ہی صحرا تھا

گفتگو کا کوئی تو ملتا سرا

پھر اسے ناراض کر کے دیکھتے

اڑانوں نے کیا تھا اس قدر مایوس ان کو

تھکے ہارے پرندے جال میں خود پھنس رہے تھے