maston pe ungliyan na uThao bahaar mein

mastoñ pe uñgliyāñ na uThāo bahār meñ

dekho to hosh hai bhī kisī hoshyār meñ

kuchh mohtasib kā ḳhauf hai kuchh shaiḳh kā lihāz

piitā huuñ chhup ke dāman-e-abr-e-bahār meñ

vo sāmne dharī hai surāhī bharī huī

donoñ jahāñ haiñ aaj mire iḳhtiyār meñ

allāh baat kyā hai ki dīvāngī mirī

dīvāngī nahīñ nazar-e-hoshiyār meñ

jhūTī tasalliyoñ se na bahlāo jaao jaao

jaao ki tum nahīñ ho mire iḳhtiyār meñ

huuñ vādī-e-hayāt meñ is tarah sust-e-gām

jaise ho pā-shikasta koī ḳhār-zār meñ

ab vo sukūn-e-yās na vo iztirāb-e-shauq

siine meñ dil hai yā koī lāsha mazār meñ

ab ḳhaak uḌā.iye na hamāre mazār kī

ab ḳhaak bhī nahīñ hai hamāre mazār meñ

tanhā.ī-e-firāq meñ ummīd bār-hā

gum ho ga.ī sukūt ke hañgāma-zār meñ

vo andalīb-e-gulshan-e-ma.anī huuñ maiñ 'hafīz'

soz-e-suḳhan se aag lagā duuñ bahār meñ

maston pe ungliyan na uThao bahaar mein

dekho to hosh hai bhi kisi hoshyar mein

kuchh mohtasib ka KHauf hai kuchh shaiKH ka lihaz

pita hun chhup ke daman-e-abr-e-bahaar mein

wo samne dhari hai surahi bhari hui

donon jahan hain aaj mere iKHtiyar mein

allah baat kya hai ki diwangi meri

diwangi nahin nazar-e-hoshiyar mein

jhuTi tasalliyon se na bahlao jao jao

jao ki tum nahin ho mere iKHtiyar mein

hun wadi-e-hayat mein is tarah sust-e-gam

jaise ho pa-shikasta koi KHar-zar mein

ab wo sukun-e-yas na wo iztirab-e-shauq

sine mein dil hai ya koi lasha mazar mein

ab KHak uDaiye na hamare mazar ki

ab KHak bhi nahin hai hamare mazar mein

tanhai-e-firaq mein ummid bar-ha

gum ho gai sukut ke hangama-zar mein

wo andalib-e-gulshan-e-mani hun main 'hafiz'

soz-e-suKHan se aag laga dun bahaar mein