nazar mein yaadon ke manzar sameT kar rakhna

nazar meñ yādoñ ke manzar sameT kar rakhnā

maiñ jaisā chhoḌ ke aa.ī huuñ vaisā ghar rakhnā

udaas āñkhoñ se hoñ zindagī kī barsāteñ

tum apne lahje meñ aisā bhī ik hunar rakhnā

na TuuT jaa.eñ kahīñ hausle uḌānoñ ke

qafas se duur parindoñ ke bāl-o-par rakhnā

tumheñ milā hai khulā āsmān phailī zamīñ

ye hai buzurgoñ kā virsa sañbhāl kar rakhnā

zamīñ kā qarz utāro to apne kāñdhoñ se

phir us ke baad qadam mehr-o-māh par rakhnā

rahī hai jhuuT kī koshish har ik zamāne meñ

sajā ke nezoñ pe sachchā.iyoñ ke sar rakhnā

savāl pūchhegī duniyā qadam qadam pe 'nasīm'

nazar ko gardish-e-daurāñ se bā-ḳhabar rakhnā

nazar mein yaadon ke manzar sameT kar rakhna

main jaisa chhoD ke aai hun waisa ghar rakhna

udas aankhon se hon zindagi ki barsaten

tum apne lahje mein aisa bhi ek hunar rakhna

na TuT jaen kahin hausle uDanon ke

qafas se dur parindon ke baal-o-par rakhna

tumhein mila hai khula aasman phaili zamin

ye hai buzurgon ka wirsa sanbhaal kar rakhna

zamin ka qarz utaro to apne kandhon se

phir us ke baad qadam mehr-o-mah par rakhna

rahi hai jhuT ki koshish har ek zamane mein

saja ke nezon pe sachchaiyon ke sar rakhna

sawal puchhegi duniya qadam qadam pe 'nasim'

nazar ko gardish-e-dauran se ba-KHabar rakhna