nazar uTha dil-e-nadan ye justuju kya hai

nazar uThā dil-e-nādāñ ye justujū kyā hai

usī kā jalva to hai aur rū-ba-rū kyā hai

kisī kī ek nazar ne batā diyā mujh ko

surūr-e-bāda-e-be-sāġhar-o-subū kyā hai

qafas azaab sahī bulbul-e-asīr magar

zarā ye soch ki vo dām-e-rañg-o-bū kyā hai

gadā nahīñ haiñ ki dast-e-savāl phailā.eñ

kabhī na aap ne pūchhā ki aarzū kyā hai

na mere ashk meñ shāmil na un ke dāman par

maiñ kyā batā.ūñ unheñ ḳhūn-e-ārzū kyā hai

suḳhan ho sam.a-ḳharāshī to ḳhāmushī behtar

asar kare na jo dil par vo guftugū kyā hai

nazar uTha dil-e-nadan ye justuju kya hai

usi ka jalwa to hai aur ru-ba-ru kya hai

kisi ki ek nazar ne bata diya mujh ko

surur-e-baada-e-be-saghar-o-subu kya hai

qafas azab sahi bulbul-e-asir magar

zara ye soch ki wo dam-e-rang-o-bu kya hai

gada nahin hain ki dast-e-sawal phailaen

kabhi na aap ne puchha ki aarzu kya hai

na mere ashk mein shamil na un ke daman par

main kya bataun unhen KHun-e-arzu kya hai

suKHan ho sama-KHarashi to KHamushi behtar

asar kare na jo dil par wo guftugu kya hai