safar ki dhup mein chehre sunahre kar liye humne

safar kī dhuup meñ chehre sunahre kar liye ham ne

vo andeshe the rañg āñkhoñ ke gahre kar liye ham ne

ḳhudā kī tarh shāyad qaid haiñ apnī sadāqat meñ

ab apne gird afsānoñ ke pahre kar liye ham ne

zamāna pech-andar-pech thā ham log vahshī the

ḳhayāl āzār the lahje ikahre kar liye ham ne

magar un sīpiyoñ meñ pāniyoñ kā shor kaisā thā

samundar sunte sunte kaan bahre kar liye ham ne

vahī jiine kī āzādī vahī marne kī jaldī hai

divālī dekh lī ham ne dasahre kar liye ham ne

safar ki dhup mein chehre sunahre kar liye hum ne

wo andeshe the rang aankhon ke gahre kar liye hum ne

KHuda ki tarh shayad qaid hain apni sadaqat mein

ab apne gird afsanon ke pahre kar liye hum ne

zamana pech-andar-pech tha hum log wahshi the

KHayal aazar the lahje ikahre kar liye hum ne

magar un sipiyon mein paniyon ka shor kaisa tha

samundar sunte sunte kan bahre kar liye hum ne

wahi jine ki aazadi wahi marne ki jaldi hai

diwali dekh li hum ne dasahre kar liye hum ne