کبوتری

(مرغ کی اذان۔۔۔۔۔۔پتھریلے زینوں پر قدموں کی آواز۔۔۔۔۔۔ پھر مرغ کی اذان۔۔۔۔۔۔قدموں کی آواز۔۔۔۔۔۔مندرکا گھنٹہ ایک بار بجتا ہے۔۔۔۔۔۔وقفہ۔۔۔۔۔۔دوسری بار بجتا ہے۔۔۔۔۔۔ وقفہ۔۔۔۔۔۔دو لڑکیوں کے گنگنانے کی آوازیں جیسے وہ زیر لب پوجا کررہی ہیں۔۔۔۔۔۔ یہ گنگناہٹ چند لمحات تک جاری رہے۔۔۔۔۔۔اس کے بعد آرتی شروع ہو۔۔۔۔۔۔آرتی ختم ہو جاتی ہے۔۔۔۔۔۔وقفہ۔۔۔۔۔۔گھنٹہ ایک بار بجتا ہے۔۔۔۔۔۔ وقفہ۔۔۔۔۔۔ دوسری بار بجتا ہے۔۔۔۔۔۔پتھریلے زینوں پر قدموں کی آواز۔ یہ ظاہر کرنے کے لیئے دونوں لڑکیاں مندر سے باہر نکل رہی ہیں)

چندرا: درگی! آج کتنی ٹھنڈ ہے(سردی کے باعث سی سی کرتی ہے)

درگی: دانت سے دانت بج رہے ہیں۔

[دُور سے ڈھور ڈنگروں کے گلے میں بندھے ہوئے گھنگھروؤں کی آواز آتی ہے۔۔۔۔۔۔چند لمحات تک یہ آواز آتی رہتی ہے جس سے یہ پتا چلے کہ پاس ہی سے یہ مویشی گزر رہے ہیں]

چندرا: درگی! آج وہ تیرا کمبل والا دکھائی نہیں دیا۔ جو تیری طرف گُھور گُھور کر دیکھاکرتا ہے۔

درگی: آج کمبل نہ ملا ہوگا(ہنستی ہے)۔۔۔۔۔۔میں پوچھتی ہوں چندرا یہ موا ہر روز منہ اندھیرے کیوں آن ٹکپتا ہے۔۔۔۔۔۔ اس کی لال لال آنکھوں سے مجھے بہت ڈر لگتا ہے۔۔۔۔۔۔چرس پی کے آتا ہوگا۔

چندرا: جانے کیا پی کے آتا ہے پر میں اتنا جانتی ہوں کہ تجھے دیکھ کر اس کی پیاس بالکل بجھ جاتی ہے۔۔۔۔۔۔ درگی سچ کہتی ہوں وہ تجھ پر بہت بُری طرح مرتا ہے۔

درگی: تو میں کیا کروں۔۔۔۔۔۔ مرتا ہے تو مرے۔۔۔۔۔۔ میرا پیچھا چھوڑے۔۔۔۔۔۔ چندرا! تو سوچ تو سہی۔ اگر یہ موا ہر روز اسی طرح آتا رہا اور یہ بات اُڑتی اُڑتی ان کے کانوں تک پہنچ گئی تو آفت ہی آجائے گی۔

چندرا: تو اس کا کوئی اپائے کر۔۔۔۔۔۔ ایسی باتیں کب تک چھپی رہیں گی۔۔۔۔۔۔ یہ تو تجھے بھی اچھی طرح معلوم ہے کہ وہ صرف تیرے لیئے آتا ہے۔

درگی: لے میں نے قبول کیا۔ پر اب تو کوئی اپائے بتا۔۔۔۔۔۔ کس طرح اس کا آنا بند ہوسکتا ہے۔ تجھے تو ایسی باتیں خوب سوجھا کرتی ہیں۔

چندرا: (شرارت آمیز لہجے میں)تجھے کیسے سوجھیں گی۔۔۔۔۔۔ تیرا من تو ہر وقت اس گھڑ سوار تھانیدار کی بابت سوچتا رہتا ہے جو ایک روز سہرا باندھ کرتجھے اپنے ساتھ لے جائے گا اور تجھے وہ تمام باتیں سنائے گا جو ابھی تک وہ تجھ سے نہیں کہہ سکا۔۔۔۔۔۔ میں کہوں گی۔ درگی۔۔۔۔۔۔ تو بڑی بھاگوان ہے۔۔۔۔۔۔ ایسا اچھا بر تجھے مل گیا۔

درگی: تجھے بھی مل جائے گا۔ ذرا بڑی تو ہو جا۔ زیادہ چنتا نہ کیا کر۔ یہ بر اپنے آپ مل جایا کرتے ہیں۔

چندرا: میں بڑی تو ہو جاؤں گی۔ پر وہ تجھ جیسا روپ کہاں سے لاؤں گی۔۔۔۔۔۔ یہ جومیٹھی میٹھی باتیں کرنے اور دل موہ لینے کا ڈھنگ تجھے آتا ہے مجھے کہاں سے آئیگا۔۔۔۔۔۔کیا تو سکھا دے گی مجھے!

درگی: چندرا تو چھیڑ خانی کرتی ہے پر میرا دل تو بتاشے کی طرح بیٹھ رہا ہے۔۔۔۔۔۔اس نگوڑے کمبل والے نے تومجھ پرراتوں کی نیند اُچاٹ کردی ہے۔۔۔۔۔۔(مرد کے کھانسنے کی آواز۔۔۔۔۔۔یہ کون کھنکار رہا ہے۔۔۔۔۔۔یہ۔۔۔۔۔۔یہ۔۔۔۔۔۔یہ تو وہی ہے۔

چندر: (سرگوشی میں)ہاں۔۔۔۔۔۔وہی ہے۔۔۔۔۔۔وہ ببول کے نیچے کھڑا ہے۔

درگی: اندھیرے میں یوں دکھائی دیتا ہے جیسے اس پیڑ کی چھال اتر کر ایک طرف کھڑی ہوگئی ہے۔

چندرا: ہولے ہولے بات کر۔ سُن لے گا۔۔۔۔۔۔(سرگوشی میں)دیکھ۔ میرا کہا مان اور آج اس سے مل کرسارا جھگڑا ہی چکا دے۔ صاف صاف کہہ دے کہ یوں کسی کے پیچھے پرچھائیں کی طرح لگا رہنا اچھا نہیں۔ ایسا نہ ہو کہ کسی روز بیکار تھانہ تھنول ہو جائے۔۔۔۔۔۔ بس اتنا کہہ دے کہ ان تِلوں میں تیل نہیں۔۔۔۔۔۔ سمجھیں۔

درگی: سمجھ گئی۔ پر مجھے ڈرلگتا ہے۔۔۔۔۔۔ چندرا ایسا نہ ہو۔۔۔۔۔۔

چندرا: ایسا نہ ہو۔ ویسا نہ ہو۔۔۔۔۔۔ اب تو چھوڑ اس سوچ بچار کو۔ جا اس سے بات کر۔۔۔۔۔۔ ایسا موقع پھر نہیں ملے گا۔۔۔۔۔۔ آس پاس اس وقت کوئی ہے بھی نہیں۔

درگی: (جھجھک کے ساتھ)۔۔۔۔۔۔جاتی ہوں۔

چندرا: اب چلی بھی جا۔۔۔۔۔۔ کھڑی ٹکر ٹکر میرا منہ کیا دیکھ رہی ہے۔ جا!

درگی: تو بھی ساتھ چل۔ دونوں بات کریں گے۔

چندرا: تو ٹھہر میں اسے یہیں بلاتی ہوں۔۔۔۔۔۔کھڑی رہ ۔ بھاگتی کہاں ہے۔

درگی: (ڈر کر) تو نے سچ مچ اسے اشارہ کردیا۔۔۔۔۔۔ چندرا وہ آرہا ہے۔

چندرا: تو کیا ہوا۔

(چند لمحات کا وقفہ۔۔۔۔۔۔ بالکل خاموشی)

درگی: (سرگوشی میں)پہلے تجھے ہی بات کرنی پڑے گی۔ مجھ سے نہ بولا جائے گا۔

(وقفہ)

کمبل پوش: (رک رک کر) مجھے۔۔۔۔۔۔مجھے۔۔۔۔۔۔کیا تم نے مجھے بلایا تھا۔

چندرا: ہاں۔۔۔۔۔۔ہم نے ہی بلایا تھا۔۔۔۔۔۔ بولو۔ تم کیا چاہتے ہو۔۔۔۔۔۔تم اس لڑکی کاپیچھاکیوں نہیں چھوڑتے۔۔۔۔۔۔کیوں ہر روز تم اس مندر کے پاس آن کھڑے ہوتے ہو۔ اگر تمہیں پوجا کرنی ہوتی ہے۔ تو مندر میں کیوں نہیں جاتے باہر سردی میں کیوں ٹھٹھرتے رہتے ہو۔

کمبل پوش: پوجا مندروں کے باہربھی ہو سکتی ہے۔

چندرا: سُنا تم نے درگی۔۔۔۔۔۔

درگی: (گھبرا کر)۔۔۔۔۔۔چلو۔ چندرا چلیں۔

چندرا: اگر تجھے مندروں کے باہر ہی پوجا کرنی ہے تو کر پرتو درگی کی طرف گُھور گُھور کے کیوں دیکھا کرتا ہے۔

کمبل پوش: میں تو جدھر دیکھتا ہوں ادھر مجھے اپنے ہی وچار نظر آتے ہیں۔۔۔۔۔۔ میں انہیں ہی گھور گھور کے دیکھتا ہوں۔ اس کو تو میری آنکھیں دیکھ ہی نہیں سکتیں میرے وچار ہر چیز پر کہرے کی طرح چھا جاتے ہیں۔

درگی: جانے کیا پہیلیاں بجھوا رہا ہے۔ آؤ چلیں۔

چندرا: (درگی سے)ٹھہرو۔ مجھے پوری بات تو کرلینے دے(کمبل پوش سے) تو اس کا مطلب یہ ہے کہ تو اپنی ہٹ نہیں چھوڑے گا۔

کمبل پوش: ہٹ تو وہ کرسکتا ہے جس میں ہٹ کرنے کی شکتی ہو۔ میں کیا ہٹ کروں گا۔ میری تو کوئی چیز بھی میرے کہنے میں نہیں۔

چندرا: جبھی تو یہ پاگل پن تیرے سر میں سما گیا ہے۔

درگی: (تنگ آکر)۔۔۔۔۔۔میں تجھ سے ایک بات پوچھوں۔۔۔۔۔۔ کیا تو پریم کرتا ہے مجھ سے؟

چندرا: جواب دے اس کی بات کا۔

کمبل پوش: (اُداس آواز میں) اب کوئی بات جواب دینے کی نہیں رہی۔۔۔۔۔۔ میں کل سے ادھر نہیں آؤں گا۔۔۔۔۔۔(خشک پتوں پرچلنے کی آواز۔۔۔۔۔۔چند لمحات کے لیئے)

درگی: چندرا! اس کی آواز میں ان سوکھے ہوئے پتوں کی سی کھڑکھڑاہٹ تھی۔۔۔۔۔۔اس آدمی سے مجھے اتنا ڈر کیوں لگتا ہے۔۔۔۔۔۔؟

(سوکھے ہوئے پتوں پر چلنے کی آواز۔۔۔۔۔۔ٹہنیاں چٹختی ہیں پتے کھڑکھڑاتے ہیں۔۔۔۔۔۔ یہ آوازیں آہستہ آہستہ فیڈ ہوتی جائیں۔۔۔۔۔۔ ذیل کے گیت کے سُر اُبھرتے آئیں)

کھڑکھڑ پت جھڑ آئی۔۔۔۔۔۔پگلے

کھڑکھڑپت جھڑ آئی

جھکڑ چیخے،شاخیں چٹخیں، سوکھے پتے ٹوٹے

آشا کی کلیاں کملائیں، کانچ کے سپنے ٹوٹے

پریم کا سندر دیپک بھڑکا، من کی چتا جلائی

کھڑکھڑپت جھڑ آئی۔۔۔۔۔۔پگلے

کھڑکھڑپت جھڑ آئی

راس نہ آیا دکھیاروں کو پل بھر کا مسکانا

آنکھ کی اسی جھپکی میں بکھرا پریم کا تانا بانا

کیسا پوٹھا بھاگ بنایا ہے بھگوان دہائی

کھڑکھڑپت جھڑ آئی۔۔۔۔۔۔پگلے

کھڑکھڑپت جھڑ آئی

نوٹ: (اس بات کا خاص طورپر خیال رکھا جائے کہ یہ گیت ایک ہی ویلیوم میں براڈ کاسٹ نہ ہو۔۔۔۔۔۔مصنف یہ چاہتا ہے کہ گیت کےُ سر کبھی دھیمے ہو جائیں اور کبھی اونچے ہو جائیں جس سے سننے والوں کو یہ معلوم ہو کہ کوئی آدمی دُور گا رہا ہے جس کی آواز ہوا کے جھونکوں سے آرہی ہے۔ یہ گیت کمبل پوش کا ہوگا)

کمبل پوش: دور دور تک جدھر نظر دوڑاتا ہوں اونچے اونچے پیڑ دکھائی دیتے ہیں جن کی ٹہنیوں سے پتے یوں جھڑ گئے ہیں جیسے میری آشائیں۔۔۔۔۔۔ اب میں بھی اس ویرانے کا ایک ٹنڈ منڈ پیڑ ہوں۔۔۔۔۔۔ہوائیں اُداسیوں سے بوجھل ہورہی ہیں۔۔۔۔۔۔ سوکھے پتے کھڑکھڑاتے ہیں تو ایسا معلوم ہوتا ہے اداس دل دھڑک رہے ہیں۔۔۔۔۔۔(چیل کی اداس چیخ)چیل کی اس پتلی آواز نے میرے سارے جیون پر ایک لکیر سی کھینچ دی ہے۔۔۔۔۔۔(گھبراکر) مجھے کیا ہوگیا ہے۔۔۔۔۔۔(چونک کر)۔۔۔۔۔۔تم۔۔۔۔۔۔تم کون ہو؟

کملو: (تتلا کر)میں۔۔۔۔۔۔میں کملو ہوں۔

کمبل پوش: کملو کون۔۔۔۔۔۔ تو یہاں جھاڑیوں کے پیچھے کیوں چھُپی ہوئی تھی۔

کملو: مجھ سے کسی نے کہا تھا کہ تم سادھو ہو۔۔۔۔۔۔ دل کی باتیں بتا سکتے ہو۔۔۔۔۔۔ میں تم سے کچھ پوچھنے آئی تھی۔

کمبل پوش: (ہنستا ہے) یہ تم سے کس نے کہا!

کملو: سارے گاؤں والے یہی کہتے ہیں۔

کمبل پوش: (ہنستا ہے )کیا کہتے ہیں!

کملو: گاؤں میں آج کل تمہارا بہت چرچا ہے۔ لوگ کہتے ہیں تم دنیا چھوڑ کر اس جنگل میں آبیٹھے ہو اور ایشور بھگتی کررہے ہو۔ اگر تم کسی کو اشیش دو گے تو اس کا بیڑا پار ہو جائے گا۔

کمبل پوش: (سرد آہ بھر کر) جو اپنے لیئے کچھ نہ کرسکا وہ تیرے لیئے کیا کرسکے گا بھولی لڑکی۔۔۔۔۔۔ یہ دنیا والے کیسے ہیں! جو آدمی بالکل نراش ہوکر ایک کونے میں بیٹھ جائے اسے اپنی مشکلیں آسان کرنے والا سمجھنے لگتے ہیں۔۔۔۔۔۔ بول تو سہی تو کیا چاہتی ہے۔

کملو: (بڑے بھولے پن کے ساتھ) اس پھاگن کو میرا بیاہ ہونے والا تھا پھر۔۔۔۔۔۔

کمبل پوش: بول۔۔۔۔۔۔بول ۔۔۔۔۔۔اس پھاگن کو تیرا بیاہ ہونے ولا تھا پھر!

کملو: (شرما کر) ہمارے گاؤں کا ایک پٹواری ہے اس کی باپو سے نہیں بنتی۔ اس کلموہے نے بھانجی ماردی اور بیاہ رک گیا۔۔۔۔۔۔ کوئی ایسی بات کرو جس سے یہ روک دُور ہو جائے۔۔۔۔۔۔ اگلے مہینے درگی کا بیاہ ہورہا ہے۔ وہ مجھ سے دو برس چھوٹی ہے۔۔۔۔۔۔(شرما کر جلدی جلدی)۔۔۔۔۔۔اب۔۔۔۔۔۔اب میں تم سے کیا کہوں۔ تم ساری بات سمجھ تو گئے ہو۔

کمبل پوش: درگی کا بیاہ ہورہا ہے۔۔۔۔۔۔! کیا سچ مچ درگی کا بیاہ ہورہا ہے! کیا اگلے مہینے وہ بیاہ دی جائے گی!اگر یہ سچ ہے تو وہ۔۔۔۔۔۔اتنی سُندر کیوں تھی؟

کملو: کیا کہا!

کمبل پوش: (سنبھل کر)کچھ نہیں۔۔۔۔۔۔دیکھو کملو۔۔۔۔۔۔ میں نے آج تک اپنے لیئے بھی ایشور سے کچھ نہیں مانگا۔ پر میں تیرے لیئے ضرور پرارتھنا کروں گا۔ ایک شرط ہے کہ تجھے میرا ایک چھوٹا سا کام کرنا ہوگا۔

کملو: بولو۔ کیا کام ہے۔۔۔۔۔۔ میں ضرور کروں گی۔

کمبل پوش: جب درگی سج بن کر دلہن بن جائے گی اور اس کا من کبوتری کے پوٹے کی طرح آنے والی گھڑیوں کے گرم گرم خیالوں سے بھرا ہوگا تو کملو تو اسے ایک طرف لے جائیو اور اس کے کان میں ہولے ہولے کہیو۔’’وہ آدمی جو تجھے مندر کے پاس گُھورگُھور کے دیکھا کرتا تھا، گُمہوگیا ہے۔ اب صرف اس کی آواز رہ گئی ہے جو سدا اس گاؤں کی پگ ڈنڈیوں پر بھٹکتی رہے گی۔۔۔۔۔۔ بھول نہ جائیو کملو۔۔۔۔۔۔جب کنوار پنے کی لو آخر ی باردرگی کے مکھڑے پر جھلملائے گی تو میری جگہ تو آگے بڑھے گی اور دھیرے سے یہ کہہ کر اسے بجھا دے گی۔’’لے اب تو پھسل کر اندھیرے میں ڈوب جا‘‘۔۔۔۔۔۔کملو یہ سب باتیں تجھے کہنی پڑیں گی۔

(یہاں سے عقب میں شہنائیوں کی آواز شروع ہو بالکل دھیمی)۔۔۔۔۔۔

جب شہنائیاں بج رہی ہوں گی اور ایسا معلوم ہوگا کہ تیکھے تیکھےُ سر آپس میں ننھی ننھی چڑیوں کی طرح لڑ جھگڑ رہے ہیں تو کملو تو اس سے کہے گی:’’ جا! ارمانوں بھری ڈولی میں بیٹھنے سے پہلے اس آدمی سے مل جس کے دل میں اب کوئی ارمان نہیں رہا۔ وہ مندر کے پاس تیرا انتظار کررہا ہے۔۔۔۔۔۔‘‘

(شہنائیوں کی آواز عقب سے ابھر آئے۔ ایسا معلوم ہو کہ شادی ہورہی ہے۔ شہنائیوں کے عقب میں ہجوم کا ریکارڈ بھی لگا دیا جائے تاکہ آواز کا یہ پردہ دبیز ہو جائے۔۔۔۔۔۔چند لمحات کے بعد شہنائیوں کی آواز فیڈ کردی جائے)

نوٹ:(جونہی شہنائیوں کی آواز تحلیل ہو۔ پانچ چھ لڑکیوں کی ہنسی کا ایک فوارہ سا چھوٹ پڑے۔)

چندرا: رادھا! درگی کی اس چم چم کرتی چولی کی طرف تو دیکھ۔ کیا پھنسی پھنسی آئی ہے۔

رادھا: اور یہ اس کی گھگری۔۔۔۔۔۔اوپر سے میٹھا میٹھا اور نیچے سے نیچے کھلا کھلا جھول۔۔۔۔۔۔دُورسے دیکھ۔ ایسا لگتا ہے کھمبی پر تیتری بیٹھ گئی ہے۔

درگی: چل ہٹ دور ہو۔

رادھا: افوہ۔۔۔۔۔۔ بڑی لاج آتی ہے میری بنو کو۔۔۔۔۔۔آج رات۔۔۔۔۔۔ آج رات(درگی اس کا منہ ہاتھ سے بند کردیتی ہے۔ رادھا کی سانس بند ہونے لگتی ہے۔ چنانچہ وہ درگی کا ہاتھ ہٹانے کی کوشش کرتے ہوئے کہتی ہے)درگی۔۔۔۔۔۔ درگی۔۔۔۔۔۔نہ کر۔۔۔۔۔۔ میری سانس رک جائے گی۔۔۔۔۔۔یہ میری نگوڑی ناک کل سے بند ہے۔۔۔۔۔۔ اب چھوڑ بھی دے(درگی ہاتھ ہٹالیتی ہے) بھئی ایسا مذاق ہمیں اچھا نہیں لگتا اور جو ہم تیرا گلا گھونٹ دیں۔۔۔۔۔۔

چندرا: چل دُور ہو۔ موئی کلجپھی۔۔۔۔۔۔

رادھا: تجھے کس نے بیچ میں پنچ بنایا ہے۔ میں جو چاہوں کہوں گی۔۔۔۔۔۔اچھادرگی میری ایک بات تو سُن۔۔۔۔۔۔(شرارت آمیز لہجے میں)آج وہ تیرا تھانیدار لوٹ پوٹ ہی تو ہوجائے گا تجھے ان کپڑوں میں دیکھ کر۔

کملو: اب تو درگی تھانیدارنی ہو جائے گی۔

(سب لڑکیاں ہنستی ہیں)

درگی: تو کیوں جلتی ہے۔

چندرا: ورگی بات سُن میری۔۔۔۔۔۔ادھر آ(درگی کے جھانجھ بندھے پیروں کی آواز)۔۔۔۔۔۔ارے مجھ سے کیوں جھینپتی ہے۔ میں تھانیدار تھوڑی ہوں۔

درگی: بول کیا کہنا ہے تجھے۔

چندرا: اگر اس نے تجھے ہتھکڑی لگا دی تو وہ باتیں تیری ساری دھری رہ جائیں گی جو تو نے مجھ سے کہی تھیں۔۔۔۔۔۔وہ تیری ہٹ نہیں مانے لگا۔ اسے تو بہت سے گُر آتے ہوں گے منانے کے۔۔۔۔۔۔کیوں رادھا(ہنستی ہے)

رادھا: (ہنستی ہے) سچ ہے۔ ہاتھوں میں ہتھکڑیاں اور پاؤں میں بیڑیاں ڈال دے تو کیا کرے گی بیچاری درگی۔۔۔۔۔۔ ہار ماننا ہی پڑے گی بابا۔۔۔۔۔۔ یہ تھانیدار میں سنتی ہوں بڑے کڑے مزاج کے ہوتے ہیں۔

درگی: بس تو اب رکے گی نہیں۔۔۔۔۔۔ اپنی بکواس کرتی ہی چلے جائے گی(لہجہ بدل کر)۔۔۔۔۔۔ان کا مزاج تو بہت نرم ہے۔۔۔۔۔۔وہ تو مجھ سے کچھ نہ کہیں گے۔

چندرا: ہاتھ تک نہ لگائیں گے۔۔۔۔۔۔ چھوئی موئی جو ہوئی۔

رادھا: درگی سچ سچ بتا۔۔۔۔۔۔ ان سے ملے تجھے کتنے دن ہوگئے ہیں۔

درگی: (جھوٹ بولتی ہے)۔۔۔۔۔۔ میں نے تو انہیں کبھی دیکھا ہی نہیں اور پھر میں ان سے کیوں ملنے لگی۔۔۔۔۔۔ میرے کیا لگتے تھے جو میں ان سے ملتی۔

چندرا: میرے سامنے بھی جھوٹ بولنے سے باز نہیں آئی۔۔۔۔۔۔ابھی تو اس سے کل ہی مندر کے پرلی طرف ببولوں کے جھنڈ میں چھپ چھپ کر باتیں کررہی تھی اور میں دور کھڑی دیکھ رہی تھی کہ کوئی آنہ جائے۔

کملو: درگی کیا باتیں ہوئی تھیں؟

ورگی: جانے میری جوتی کیا باتیں ہوئی تھیں۔۔۔۔۔۔ مجھے کیا غرض پڑی تھی اس سے ملنے کی۔ چندرا تو مجھ سے ضرور پٹے گی۔

رادھا: دہائی بابا۔۔۔۔۔۔پروں پر پانی ہی نہیں لیتی۔۔۔۔۔۔تو کیا ہوا۔ تو نے ان سے بات چیت کی تو بڑا اچھا کیا۔ جھجھک دُور ہوگئی۔۔۔۔۔۔ آج جب وہ تجھے ڈولی میں ڈال کر لے جائیں گے تو شرم سے گٹھڑی سی تو نہ بنے گی۔۔۔۔۔۔بڑی میٹھی میٹھی باتیں ہوں گی۔ وہ تجھے دھیرے دھیرے چھیڑیں گے۔۔۔۔۔۔ گدگدائیں گے۔ کبھی تو بھی ان کو ستائے گی چہلیں ہوں گی اور پھر۔۔۔۔۔۔

درگی: (بات کاٹ کر) تیرا من کیوں للچاتا ہے؟

(ایک اور لڑکی بھاگی بھاگی آتی ہے۔)’’درگی۔درگی‘‘کہتی ہے۔ پہلے یہ آواز دُور سے آتی ہے۔ پھر قریب تر ہوتی جاتی ہے۔)

کانتا: درگی۔۔۔۔۔۔درگی۔۔۔۔۔۔درگی۔۔۔۔۔۔برات آگئی۔۔۔۔۔۔(کملو سے)کملو۔درگی کا دولہا میں نے دیکھا ہے۔۔۔۔۔۔بڑا سُندر ہے۔۔۔۔۔۔یہ بڑی بڑی کالی مونچھیں۔۔۔۔۔۔لمبا تڑنگا۔۔۔۔۔۔ اچھا گبھرو جوان ہے۔(یہاں سے شہنائیوں کی آواز فیڈ ان کی جائے۔۔۔۔۔۔ آہستہ آہستہ یہ آواز ابھرتی آئے۔بہت آہستہ آہستہ۔۔۔۔۔۔گھوڑی بہت سندر ہے۔۔۔۔۔۔(درگی سے)درگی اب تو کھاٹ پر بیٹھی راج کرئے گی۔۔۔۔۔۔رادھا۔۔۔۔۔۔چندرا۔۔۔۔۔۔کملو آؤ چلیں۔ برات دیکھیں۔۔۔۔۔۔تو کھڑکی میں سے چپکے چپکے سب کچھ دیکھ لیجیؤ۔۔۔۔۔۔چلو چلیں(تین چار لڑکیوں کے جانے کی آواز۔۔۔۔۔۔ہنسی اور باتوں کا مِلا جُلا شور۔۔۔۔۔۔شہنائیوں کی قدرے آواز ابھر آتی ہے۔۔۔۔۔۔ چند لمحات تک کوئی نہیں بولتا)

درگی: کملو۔ جا تو بھی جا۔ باہر جا کے تو بھی تماشا دیکھ۔

کملو: مجھے ایک ضروری بات کہنی ہے تجھ سے۔

درگی: ضروری بات۔۔۔۔۔۔ کیسی ضروری بات۔

کملو: (دبی زبان میں) وہ آدمی جو مندر کے پاس گُھور گُھور کے دیکھا کرتا تھا گم ہوگیا ہے(درگی ایک آہ کے ساتھ کہتی ہے۔’’گُم ہوگیا ہے‘‘) اب صرف اس کی آواز رہ گئی ہے جو سدا اس گاؤں کی پگڈنڈیوں پر بھٹکتی رہے گی۔۔۔۔۔۔پھر اس نے کہا تھا۔۔۔۔۔۔

درگی: (کمزور آواز میں)۔۔۔۔۔۔کیا کہا تھا!

کملو: جب کنوار پنے کی لو آخری بار درگی کے مکھڑے پر جھلملائے گی تو میری جگہ تو آگے بڑھے گی اور دھیرے سے یہ کہہ کر اسے بجھا دے گی۔ لے اب تو پھسل کر اندھیرے میں ڈوب جا(شہنائیوں کی آواز ایک لمحے کے لیئے اونچی ہو جاتی ہے)

درگی: (ڈر کر چیختی ہے)کملو!

کملو: اس نے یہ بھی کہا تھا کہ جب شہنائیاں بج رہی ہوں گی اور ایسا معلوم ہوگا کہ تیکھے تیکھے سر آپس میں ننھی ننھی چڑیوں کی طرح لڑ جھگڑ رہے ہیں تو کملو تو اس سے کہے گی۔’’جا۔ ارمانوں بھری ڈولی میں بیٹھنے سے پہلے اس آدمی سے مل آ جس کے دل میں اب کوئی ارمان نہیں رہا۔۔۔۔۔۔ وہ مندر کے پاس تیرا انتظار کررہا ہے۔۔۔۔۔۔بس یہی اس کا سندیس تھا جو میں نے تجھے دے دیا۔

درگی: وہ مندر کے پاس میرا انتظار کررہا ہے۔۔۔۔۔۔کیوں؟۔۔۔۔۔۔ کملو وہ مندر کے پاس میرا کیوں انتظار کررہا ہے؟۔۔۔۔۔۔ میں نہیں جاؤں گی۔۔۔۔۔۔ میں نہیں جاؤں گی۔۔۔۔۔۔ وہ مجھے کیوں ڈراتا ہے کملو۔۔۔۔۔۔ وہ کیوں میرے پیچھے پڑا ہے۔۔۔۔۔۔میں نے اس کا کیا بگاڑا ہے۔۔۔۔۔۔ وہ کیوں میری مانگ کا سیندور مٹانا چاہتا ہے۔۔۔۔۔۔میں نہیں جاؤں گی۔۔۔۔۔۔ میں کبھی نہیں جاؤں گی۔۔۔۔۔۔

(شہنائیوں کی آواز بلند سے بلند تر ہوجاتی ہے۔۔۔۔۔۔ آخر میں جھانجھ کی جھنکار کے ساتھ یہ آواز بلندی پر جا کر رُک جاتی ہے۔۔۔۔۔۔ ایک لمحے کے لیئے مکمل سکوت۔۔۔۔۔۔ پھر سُوکھے ہوئے پتوں اور خشک ٹہنیوں پر کمبل پوش کے چلنے کی آواز۔۔۔۔۔۔)

کمبل پوش: (خشک پتوں پر چلتے ہوئے)نہیں آئی(رک جاتا ہے) نہیں آئی بارات چلی گئی۔وہ نہیں آئی۔۔۔۔۔۔ آتی بھی کیوں؟ میراس پر کیا ادھیکار تھا۔۔۔۔۔۔(وقفے کے بعد اپنے آپ سے) مورکھ وہ بول جو تیرے ہونٹوں پر نہیں آئے کیا انہیں کے بل پر تو اسے یہاں بلوانا چاہتا تھا۔(اداس ہنسی) کیسے کیسے مورکھ اس دنیا میں بستے ہیں۔۔۔۔۔۔(وقفہ)وہ آجاتی۔۔۔۔۔۔اسے آخری بار دیکھ لیتا(لہجہ بدل کر) تو کیا ہوتا؟ سب من پر چاوے کی باتیں ہیں(خشک پتوں پرچلتا ہے) ٹھیک ہے پھر اس کو دیکھنے اور بار بار دیکھنے کی چاہ میرے دل میں کیوں چٹکیاں لیتی ہے۔۔۔۔۔۔

میرے دل کی ویرانی کیسی ہے کہ جوں جوں بڑھتی ہے ایک آبادی سی پیدا ہوتی جاتی ہے۔ آج برسوں کا باغی من کیوں چاہتا ہے کہ کسی مٹی کی مورتی ہی کے سامنے جھک جائے(خشک پتوں پر چلنے کی آواز)۔۔۔۔۔۔کچھ سمجھ میں نہیں آتا۔۔۔۔۔۔ وہ اگر نہیں آئی تو اس نے ٹھیک کیا۔ اسے کیا غرض پڑی تھی یہاں آنے کی۔۔۔۔۔۔ میں کون ہوں۔۔۔۔۔۔پر۔۔۔۔۔۔پر۔۔۔۔۔۔یہ بھی تو ٹھیک ہے کہ میں۔۔۔۔۔۔میں۔۔۔۔۔۔(رک جاتا ہے) یہ زبردستی ہے۔۔۔۔۔۔مجھے اس پر کوئی ادھیکار نہیں۔۔۔۔۔۔میں مورکھ ہوں۔ مہامورکھ۔(خشک پتوں پر چلتا ہے)۔۔۔۔۔۔اس مندر میں وہ سورج کی پہلی کرن کی طرح آیا کرتی تھی پر اب نہیں آئے گی۔۔۔۔۔۔ مندر بالکل سُونا ہو جائے گا۔ میرا اُداس دل کی طرح۔۔۔۔۔۔ (پتھریلے زینوں پر قدموں کی آواز۔۔۔۔۔۔مندرکا گھنٹہ ایک بار بجتا ہے۔۔۔۔۔۔وقفہ۔۔۔۔۔۔دوسری بار بجتا ہے۔۔۔۔۔۔(وقفہ) اس مورتی کی طرف دیکھتا ہوں تو ایسا معلوم ہوا ہے میرا ہی کوئی نامکمل خیال باہر نکل کر پتھرا گیا ہے۔۔۔۔۔۔ باسی پھولوں کی باس کتنی اداس ہے۔۔۔۔۔۔ پھول میں سے جب باس باہر نکلتی ہے تو اس کو تکلیف تو ضرور ہوتی ہوگی۔۔۔۔۔۔فرش پر چنبیلی کی یہ بکھری ہوئی پتیاں کتنی نڈھال دکھائی دیتی ہیں۔۔۔۔۔۔ میں بھی کتنا نڈھال ہوں۔۔۔۔۔۔(وقفہ)۔۔۔۔۔۔جی چاہتا ہے پرارتھنا کروں۔۔۔۔۔۔ پر ان نیند کے ماتے دیوتاؤں کو پہلے جگا تو لوں(چند لمحات گھنٹہ بجاتا ہے) بھگوان۔۔۔۔۔۔دنیا کو تباہ اور برباد کرنا تیرے بائیں ہاتھ کا کھیل ہے۔۔۔۔۔۔ تو بھونچال لا سکتا ہے۔ آکاش سے بجلیاں گرا سکتا ہے۔۔۔۔۔۔ تو سب کچھ کر سکتا ہے۔ میں التجا کرتا ہوں کہ تو میرے اس ننھے سے دل میں اس کا خیال کچل دے۔۔۔۔۔۔یہ نہیں کرسکتا تو میری تمام سوچنے سمجھنے کی طاقتیں مجھ سے چھین لے۔۔۔۔۔۔میرے پہلو میں دل کی جگہ برف کا ڈھیلا رکھ دے جس پرکوئی لکیر اگر کھچ جائے تو اپنے آپ مٹ جائے۔۔۔۔۔۔میں اس کو بھول جانا چاہتا ہوں اس لیئے کہ اس کو یاد کرنے کا مجھے کوئی بھی ادھیکار نہیں۔۔۔۔۔۔

(وقفہ۔۔۔۔۔۔پتھریلے فرش پر چند قدموں کی آواز۔۔۔۔۔۔گھنٹہ ایک بار بجتا ہے۔۔۔۔۔۔وقفہ۔۔۔۔۔۔ پتھریلے زینوں پر قدموں کی آواز۔۔۔۔۔۔ فیڈ آؤٹ فیڈ ان گھوڑے کی ٹاپ)

نوٹ: گھوڑے کی ٹاپوں کی آواز چند لمحات تک آتی رہے۔ اس کے بعد گھوڑے کے رُکنے کی آواز آئے۔

تھانیدار: تم تھک گئی ہوگی۔۔۔۔۔۔ یہاں اس جھاڑ کی چھاؤں میں کچھ دیر سستا لیں پھر چلیں گے(گھوڑے پر سے اُترنے کی آواز)

درگی: میں تو نہیں تھکی۔۔۔۔۔۔ آپ نے گھوڑی کیوں رُوک لی۔

تھانیدار: یہاں کچھ دیر بیٹھیں گے۔ کچھ باتیں کریں گے۔۔۔۔۔۔ تمہارے گھر پہنچ گئے تو تم سے باتیں کرنے کا موقع کہاں ملے گا۔

درگی: (شرمیلی ہنسی) آپ کی تو باتیں ہی ختم نہیں ہوتیں۔۔۔۔۔۔اتنی تو کر چکے۔

تھانیدار: ابھی تو میں نے شروع بھی نہیں کیں اور تم گھبرا گئیں۔۔۔۔۔۔مرد بڑے باتونی ہوتے ہیں درگی(ہنستا ہے)۔۔۔۔۔۔ لو اب میرا سہارا لے کر نیچے اُتر آؤ۔

درگی: (نیچے اترتی ہے) اب نیچے اتری ہوں تو تھکن ہڈیوں تک پہنچ گئی ہے۔۔۔۔۔۔چلتے رہتے تو۔۔۔۔۔۔

تھانیدار: عورتیں جھوٹ بہت بولتی ہیں۔

درگی: میں نے کب جھوٹ بولا۔

تھانیدار: اب تم چاہتی ہو کہ جس طرح میں تھانے میں جھوٹ بولنے والوں سے سچ کہلواتا ہوں اس طرح تم سے بھی کہلواؤں۔۔۔۔۔۔ سو یہ میں کر نہیں سکتا۔

درگی: کیوں؟

تھانیدار: اس لیئے کہ تمہارے سامنے میں تھانیدار نہیں رہتا۔

درگی: کیا رہ جاتے ہیں۔

تھانیدار: سب جانتے ہو پھر کیوں پوچھتی ہو۔۔۔۔۔۔ چلو آئے۔ بیٹھ کر کچھ کھا لیں۔

(تھوڑا وقفہ) ٹھہرو مجھے یہ چادر بچھا لینے دو۔۔۔۔۔۔ بیٹھ جاؤ۔۔۔۔۔۔بیٹھ جاؤ۔ میرے لیئے کافی جگہ نکل آئے گی۔۔۔۔۔۔ اب بیٹھ بھی جاؤ۔

درگی: پہلے آپ بیٹھئے۔

تھانیدار: تو یہ جھگڑا کبھی ختم نہ ہوگا۔ میں کہوں گا تم پہلے بیٹھو تم کہو گی میں پہلے بیٹھوں۔۔۔۔۔۔لو اب بیٹھ جاؤ۔۔۔۔۔۔ چھاؤں بڑی گھنی ہے ہوا بھی خوب چل رہی ہے۔

درگی: بیٹھ گئی۔۔۔۔۔۔ لیجئے اب آپ کو جو باتیں کرنی ہوں کیجئے۔

تھانیدار: کس کمبخت کو یاد رہا ہے۔ کیا کہنا تھا۔۔۔۔۔۔ لو۔ تھوڑا سا یہ حلوہ کھا لو۔ کچوری کے ساتھ ۔ اچھا لگے گا۔

درگی: کھاتی ہوں۔۔۔۔۔۔ آپ میرے منہ میں کیا ٹھونستے جارہے ہیں۔

تھانیدار: تمہیں بُرا لگا۔

درگی: جی نہیں۔بُرا کیوں لگے گا۔۔۔۔۔۔ میں آپ کھالوں گی۔ آپ کیوں تکلیف کرتے ہیں۔

تھانیدار: نہیں تمہیں میری جان کی قسم۔۔۔۔۔۔ یہ میرے ہاتھ سے ضرور کھاؤ۔

درگی: لائیے کھا لیتی ہوں(منہ بھر جاتا ہے۔۔۔۔۔۔ہنستی ہے) آپ نے تو میرا منہ بھر دیا۔

تھانیدار: میرے پاس موتی ہوتے تو اس وقت ان سے تمہارا منہ بھر دیتا۔۔۔۔۔۔درگی۔۔۔۔۔۔درگی۔۔۔۔۔۔

درگی: کہیئے۔

تھانیدار: تم بہت اچھی ہو۔

درگی: (ہنستی ہے)بس؟

تھانیدار: بس۔

درگی: تو مجھے پانی پلائیے۔ آپ کی یہ کچوری میرے گلے میں پھنس گئی ہے پانی پلائیے۔

تھانیدار: پانی۔۔۔۔۔۔پانی تو یہاں نہیں۔۔۔۔۔۔

درگی: جانے دیجئے۔۔۔۔۔۔گھر جا کے پی لُوں گی۔

تھانیدار: نہیں نہیں۔ میں ابھی لا دیتا ہوں۔۔۔۔۔۔ یہاں سے کنواں دور نہیں ایک کوس سے بھی کچھ کم ہوگا اور تمہارا گاؤں تو یہاں سے بہت دُور ہے۔۔۔۔۔۔ سارا راستہ کیا پیاسی رہو گی۔

درگی: آپ کیوں تکلیف کرتے ہیں۔

تھانیدار: تم یہاں بیٹھو۔

درگی: اکیلی!

تھانیدار: تو کیا ہوا۔۔۔۔۔۔ تم یہاں بیٹھو۔ میں یوں چٹکیوں میں پانی لے کر آتاہوں۔۔۔۔۔۔ یہیں بیٹھی رہنا۔

درگی: (ہنس کر) آپ جائیے پر جلدی واپس آئیے۔

(گھوڑے پر سوار ہوتا ہے۔۔۔۔۔۔ گھوڑے کے ٹاپوں کی آواز۔۔۔۔۔۔آہستہ آہستہ یہ آواز فیڈ آؤٹ کردی جائے)

درگی: لیٹ جاتی ہوں۔۔۔۔۔۔ پیاس سے گلا سوکھ رہا ہے۔۔۔۔۔۔ جلدی آجائیں۔۔۔۔۔۔(دُور سے کسی کے گانے کی آواز آتی ہے۔۔۔۔۔۔ یاد رہے کہ یہ آواز بہت دور سے آئے اور آہستہ آہستہ۔ بالکل آہستہ آہستہ واضح ہو۔۔۔۔۔۔یہ کون گا رہا ہے ۔

گیت: جوگی سوگی ہوتے ہیں

جوگی روگی ہوتے ہیں

تپتی ریت، سُلگتا سورج، ننگے سر اور ننگے پاؤں

تو کیا جانے کس کے کارن ہم پھرتے ہیں گاؤں گاؤں

جوگی سوگی ہوتے ہیں

جوگی روگی ہوتے ہیں

ساون رت میں جب آموں پر پاپی پپیہا بولتا ہے

تو کیا سمجھے من کا پنچھی اپنے پر کیوں تولتا ہے

جوگی سوگی ہو تے ہیں

جوگی روگی ہوتے ہیں

درگی: کمبل والا۔۔۔۔۔۔!وہی کمبل والا۔۔۔۔۔۔! اب میں کیا کروں۔۔۔۔۔۔ اب میں کیا کروں!

کمبل پوش: ٹھہرو۔۔۔۔۔۔بھاگو نہیں۔۔۔۔۔۔ گر پڑو گی۔

درگی: تم۔۔۔۔۔۔تم کیوں میرا پیچھا کرتے ہو۔۔۔۔۔۔ تم یہاں کیوں میرے پیچھے پیچھے آئے؟

کمبل پوش: میں نے تو تیرا پیچھا نہیں کیا۔۔۔۔۔۔یہ ہونی ہے جو ہم دونوں کا پیچھا کررہی ہے۔۔۔۔۔۔یہاں اکیلی تو کیا کررہی ہے۔

درگی: میں اکیلی نہیں ہوں۔۔۔۔۔۔وہ پانی لینے گئے ہیں ابھی آجائیں گے۔

کمبل پوش: تو نے میری آواز پہچان لی تھی۔

درگی: نہیں۔۔۔۔۔۔(گھبرا کر) میں جاتی ہوں۔

کمبل پوش: ٹھہر جا۔۔۔۔۔۔مجھے تجھ سے ابھی کچھ کہنا ہے۔۔۔۔۔۔یاد ہے تو نے ایک بارمجھ سے یہ سوال کیا تھا’’کیا تو مجھ سے پریم کرتا ہے؟‘‘۔۔۔۔۔۔آج اس کا جواب سن لے۔۔۔۔۔۔ایسی کوئی گھڑی نہیں گئی جب میں نے تجھ سے پریم نہ کیا ہو۔۔۔۔۔۔(دُور سے گھوڑے کے ٹاپوں کی آواز۔ صرف لمحات کے لیئے)

درگی: (سخت گھبرا کر)وہ آگئے۔

کمبل پوش: جب تک میں چاہوں گا کوئی یہاں نہیں آئے گا۔ آج مجھ میں اتنی شکتی ہے کہ میں اس دھرتی کے سدا گھومنے والے چکر کو بھی کچھ دیر کے لیئے روک سکتا ہوں۔۔۔۔۔۔ تو نہیں جانتی میری کمزوریوں نے مجھے طاقتور بنا دیا ہے۔۔۔۔۔۔کھڑی رہ یہاں۔۔۔۔۔۔کچھ دیر اسی طرح اپنے چہرے پر زردیاں لیئے کھڑی رہ کہ میں تجھے آخری بار جی بھر کے دیکھ لُوں۔۔۔۔۔۔ تو نے آنکھیں کیوں میچ لیں؟۔۔۔۔۔۔ یہ تجھے ایکا ایکی کیا ہوگیا؟۔۔۔۔۔۔ وہ کون سی چیز ہے۔ جو تیری آنکھیں نہیں دیکھنا چاہتیں؟

(ایک دم فائر کی آواز)

درگی: (چیخ مارتی ہے اور گر پڑتی ہے)۔۔۔۔۔۔

ہجوم کا شوروغل فوراً ہی شروع ہو جائے۔۔۔۔۔۔ اس پر ذیل کے ٹکڑے سپرامپوز کیئے جائیں۔

ایک لڑکی: کیسے ہوا؟

دوسری لڑکی: سمجھ میں نہیں آتا۔

پہلی لڑکی: بیچاری کے ہاتھوں کی مہندی بھی ابھی نہیں اُتری تھی۔

دوسری لڑکی: وہ کون تھا جس نے گولی چلائی۔ پرماتما کرے نہ رہے اس دنیا کے تختے پر۔

پہلی لڑکی: تھانیدار ہے۔ گولی مارنے والے کا ضرور کھوج نکال لے گا۔

دوسری لڑکی: میری تو آنکھوں میں آنسو آگئے۔ جب میں نے درگی کو اس حالت میں دیکھا۔ سیروں لہو نکل گیا ہوگا۔

تیسری لڑکی: مجھے اس کے بچنے کی آشا نہیں۔ تو نے رنگ نہیں دیکھا ہلدی کے گابھے کی طرح پیلا پڑگیا ہے۔

چوتھی لڑکی: کچھ بول ہی نہیں سکتی۔

ہجوم کا شوروغل فیڈ آؤٹ کردیا جائے۔۔۔۔۔۔ذیل کا مکالمہ جب شروع ہو تو عقب میں سارنگی دھیمے دھیمے سروں میں بجتی رہے کوئی دردناک ٹیون ہو۔

تھانیدار: درگی۔۔۔۔۔۔درگی۔۔۔۔۔۔ کچھ منہ سے تو بولو۔

پٹواری: تھانیدار صاحب اگر آپ کو کچھ پوچھنا ہے تو صرف یہ پوچھئے کہ گولی کس نے چلائی۔۔۔۔۔۔ وید جی کہتے ہیں کہ بس اب چند منٹوں ہی کی بات ہے۔ جلدی کیجئے۔

تھانیدار: میں سب جانتا ہوں۔

وید: ان باتوں میں بھی وقت ضائع نہ کیجئے۔۔۔۔۔۔ایسا نہ ہو کہ۔۔۔۔۔۔

تھانیدار: (پیار سے)۔۔۔۔۔۔درگی

درگی: (کمزور آواز میں)جی۔

وید: اب جلدی پوچھ لیجئے۔

تھانیدار: پوچھتا ہوں۔ آپ گھبرائیے نہیں۔

تھانیدار: درگی۔۔۔۔۔۔ذرا آنکھیں تو کھولو مجھ سے کچھ باتیں تو کرو۔۔۔۔۔۔ یاد ہے۔ میں نے تم سے وہاں کیا کہا تھا کہ میں تم سے بہت باتیں کرنا چاہتا ہوں۔۔۔۔۔۔سُنو گی میری باتیں۔۔۔۔۔۔ اچھا بھلا یہ تو بتاؤ۔ کیا تمہیں وہ سب باتیں یاد ہیں جو وہاں جنگل میں ہوئی تھیں۔۔۔۔۔۔وہ ہرا بھرا درخت۔۔۔۔۔۔ وہ اس کی گھنی گھنی چھاؤں۔۔۔۔۔۔ گھوڑی پر سے ہمارا اُترنا۔۔۔۔۔۔ اور وہاں چادر بچھا کر بیٹھنا۔۔۔۔۔۔ یاد ہے تمہیں۔۔۔۔۔۔

پٹواری: (تشویشناک لہجے میں) تھانیدار صاحب۔۔۔۔۔۔

وید: یہ آپ نے اتنی لمبی باتیں کیوں شروع کردیں۔ جو مطلب کی بات ہے وہ پوچھئے۔

تھانیدار: میں ابھی پوچھتا ہوں۔۔۔۔۔۔ (درگی سے) ہاں درگی تو یہ باتیں تمہیں یاد ہیں نا۔۔۔۔۔۔ جب کچوری کھاتے کھاتے تمہیں پیاس لگی تھی اور میں پانی لینے چلا گیا تھا۔۔۔۔۔۔اور۔۔۔۔۔۔ تم نے مجھے کتنا روکا تھا۔

درگی: (ایک آہ کے ساتھ) جی ہاں۔

تھانیدار: اچھا درگی اب یہ بتاؤ کہ اس کے بعد کے واقعات بھی تمہیں یاد ہیں۔۔۔۔۔۔میں گھوڑی پر تمہارے لیئے پانی لے کر آیا تھا۔۔۔۔۔۔تم ادھر دُور کھڑی تھیں۔۔۔۔۔۔پھر کیا ہوا تھا؟

درگی: (کمزور آواز میں)۔۔۔۔۔۔ آپ نے فائر کیا تھا۔

(ایک لحظے کے لیئے مکمل خاموشی)

تھانیدار: (سنبھل کر) ہاں میں نے فائر کیا تھا۔۔۔۔۔۔سامنے جھاڑ پر ایک کبوتری مجھے نظر آئی تھی جسے ایک باز دبوچے ہُوئے تھا۔ میں نے ان پر فائر کیا تھا۔ پر تم یہ بتاؤ کہ تمہیں کس نے مارا؟۔۔۔۔۔۔تم مجھے اس کا نام بتاؤ۔۔۔۔۔۔ اس کا جس نے تم پر گولی چلائی ہے بہت بڑا جُرم کیا ہے۔۔۔۔۔۔اتنا بڑا جُرم کہ اس کی سزا پھانسی ہے۔۔۔۔۔۔ اگر تم قاتل کا نام بتا دو گی تو وہ یقیناً پھانسی پر چڑھا دیا جائے گا۔۔۔۔۔۔جانتی ہو پھانسی کتنی خوفناک چیز ہوتی ہے۔۔۔۔۔۔اس وقت تک آدمی رسی کے پھندے میں لٹکا رہتا ہے جب تک اس کی جان نکل نہیں جاتی۔۔۔۔۔۔ اب بتاؤ وہ کون آدمی تھا۔۔۔۔۔۔ میری بات سمجھ گئی ہو نا۔۔۔۔۔۔

درگی: (توقف کے بعد)۔۔۔۔۔۔معنی خیز ہنسی کے ساتھ۔۔۔۔۔۔میں سمجھ گئی۔۔۔۔۔۔ میں سمجھ گئی(آواز ڈوب جاتی ہے)

تھانیدار: (اونچی آواز میں)ورگی۔۔۔۔۔۔درگی۔۔۔۔۔۔درگی

(وقفہ)

وید: (گلوگیر لہجے میں)۔۔۔۔۔۔درگی پرلوک سدھار گئی اور یہ راز بھی اپنے ساتھ ہی لیتی گئی۔

(کمبل پوش کا داخلہ۔۔۔۔۔۔چار پانچ آدمیوں کی سرگوشیوں کی آواز)

وید: یہ آدمی کون ہے۔

تھانیدار: تم کون ہو؟

کمبل پوش: میں کون ہوں۔۔۔۔۔۔(سوالیہ انداز میں)میں کون ہوں؟

تھانیدار: کیا چاہتے ہو تم؟

کمبل پوش: کچھ بھی نہیں چاہتا۔۔۔۔۔۔صرف یہ کہنے آیا ہوں کہ درگی کو مارنے والا میں ہوں۔۔۔۔۔۔ اس کی جان میں نے لی ہے۔۔۔۔۔۔ مجھے گرفتار کرلیجئے۔

(حیرت بھری سرگوشیوں کا ہجوم۔ پھر فیڈ آؤٹ)