عادل اسیر دہلوی بچوں کے ادب میں ایک بہت اہم نام ہیں جنھوں نے آسان،دلنشین انداز میں بچوں کے لئے  متنوع موضوعات پر کہانیاں اور شاعری کی مختلف اصناف میں دو درجن سے زیادہ کتابیں شائع کی ہیں۔بچوں کے لئے رباعیات اور نعتیں لکھیں جو ادب اطفال میں ایک پہل مانی جاتی ہے۔ان کی بنیادی تعلیم دہلی کے اینگلو عربک اسکول میں ہوئی،بعد میں پرائیوٹ طور پر اردو میں ایم۔اے اور،عربک آنرس کیا اور فارسی میں بھی شدبد حاصل کی۔ ان کی ادبی خدمات پر فیروز مظفر نے ایک اہم کتاب مرتب کی ہے۔”عادل اسیر دہلوی:ایک مطالعہ“۔ان کو اردو کی کئی اکادمیوں نے ادب ِ اطفال کے لئے ایوارڈس سے نوازا ہے۔