گزشتہ صدی کے اواخر اور اس صدی کے اوائل میں غالب کے بارے میں ایک نکتہ زور شور سے اٹھایا گیا کہ غالب پر اس قدر لکھا جا چکا ہے کہ اب مزید کی گنجائش نہیں ہے حالانکہ اگر غالب کو الہامی مان لیا گیا ہے تو یہ مزید امکان غلط ہے۔ جیسے انگریزی میں شیکسپئر کا معاملہ ہے کہ جب تک انگریزی زبان رہے گی، شیکسپئر میں امکانات بھی باقی رہیں گے۔ یہی بات غالب پر بھی صادق آتی ہے۔ زیر نظر کتاب جو کہ غالب پر ڈاکٹر محمد سیادت نقوی صاحب کی ہے، ’مزید امکان باقی ہیں‘ کو صحیح ثابت کرتی ہے۔ اس میں انہوں نے غالب پر کچھ ایسے گوشوں سے پردہ اٹھانے کی کوشش کی ہے جو اردو اور غالب کے کسی قاری کے لیے بڑی اہمیت کے حامل ہو سکتے ہیں مثلاً پیش لفظ پروفیسر نذیر احمد جیسے اہم اسکالر نے لکھا ہے اور تقریظ مشہور ماہر غالبیات مالک رام نے۔ اس کے علاوہ اس میں غالب کی انفرادی انا، غالب کے معتبر نقاد، غالب کا نثری ادب، غالب کے فارسی و اردو کلام کا تقابل، قاطع برہان اور غالب کے ادبی معرکے جیسے اہم پہلو شامل ہیں۔