آبلے ہوں گے وہ جھٹ پھوٹ کے بہنے والے

آبلے ہوں گے وہ جھٹ پھوٹ کے بہنے والے

ہم شجر جیسے ہیں ہر چوٹ کو سہنے والے

کوک کوئل کی نہ چڑیوں کی چہک سنتے ہیں

کتنے بد بخت ہیں یہ شہر میں رہنے والے

سوچ کر پھینکنا اک دوجے پہ پتھر یارو

ہم سبھی کانچ کے محلوں میں ہیں رہنے والے

سن کے اس کان سے اس کان کے باہر کر دو

کچھ بری بات اگر کہتے ہیں کہنے والے

عرش پر کب تک اڑیں گے یہ زمیں کے پنچھی

اک نہ اک روز تو ہیں فرش پہ ڈھہنے والے

دور سے آ کے تو سب دوست ہیں اکثر ملتے

مدتوں دکھتے نہیں پاس میں رہنے والے

شعر کہنے کا ترا ڈھنگ نرالا ہے صداؔ

ورنہ شاعر ہیں بہت بحر میں کہنے والے