aadmi KHud ko bhala kaise bacha le jaega

aadmī ḳhud ko bhalā kaise bachā le jā.egā

jis jagah marnā hai us ko hādisa le jā.egā

maiñ agar tūfān se bach bhī gayā to kyā huā

merī kashtī ko bhañvar meñ nā-ḳhudā le jā.egā

aaj phir zaḳhm-e-jigar taaza hai pahle kī tarah

aaj phir mujh ko tirā ġham mai-kada le jā.egā

aaḌ meñ tafrīh kī tum chhoḌ do aiyyāshiyāñ

varna phir paanī samundar kā bahā le jā.egā

aadmī ke saath jā.eñge faqat us ke amal

aur apne saath vo duniyā se kyā le jā.egā

kis liye fariyād le ke jā.ūñ maiñ munsif ke paas

jab sitamgar apne haq meñ faisla le jā.egā

soch ai insāñ tirī hastī kī hai kitnī bisāt

tujh ko jab tūfāñ kā ik jhoñkā uḌā le jā.egā

us ke sar pe āfiyat kā sā.ebāñ hogā zarūr

saath jo ḳhanjar buzurgoñ kī duā le jā.egā

aadmi KHud ko bhala kaise bacha le jaega

jis jagah marna hai us ko hadisa le jaega

main agar tufan se bach bhi gaya to kya hua

meri kashti ko bhanwar mein na-KHuda le jaega

aaj phir zaKHm-e-jigar taza hai pahle ki tarah

aaj phir mujh ko tera gham mai-kada le jaega

aaD mein tafrih ki tum chhoD do aiyyashiyan

warna phir pani samundar ka baha le jaega

aadmi ke sath jaenge faqat us ke amal

aur apne sath wo duniya se kya le jaega

kis liye fariyaad le ke jaun main munsif ke pas

jab sitamgar apne haq mein faisla le jaega

soch ai insan teri hasti ki hai kitni bisat

tujh ko jab tufan ka ek jhonka uDa le jaega

us ke sar pe aafiyat ka saeban hoga zarur

sath jo KHanjar buzurgon ki dua le jaega