aag dil ko lage aankhon ko dhuan le jae

aag dil ko lage āñkhoñ ko dhuāñ le jaa.e

ġham bichhaḌne kā hameñ jaane kahāñ le jaa.e

ek TuuTe hue patte kī tarah haiñ ham bhī

ab havā chāhe jahāñ ham ko vahāñ le jaa.e

ham tire dukh ko uThā.e hue yuuñ phirte haiñ

jaise kāñdhe pe koī apnā makāñ le jaa.e

ham jo Dūbeñ to kināre se na dekhe koī

aur kuchh duur hameñ āb-e-ravāñ le jaa.e

koī chehra hai nazar meñ na koī manzil hai

bas chale jā.eñge ye raah jahāñ le jaa.e

jaane kis vaqt badal jaa.e bahāroñ kā samāñ

aur mahke hue phūloñ ko ḳhizāñ le jaa.e

jis taraf jā.iye sailāb-zada hai duniyā

koī rakhne ko kahāñ apnā makāñ le jaa.e

aag dil ko lage aankhon ko dhuan le jae

gham bichhaDne ka hamein jaane kahan le jae

ek TuTe hue patte ki tarah hain hum bhi

ab hawa chahe jahan hum ko wahan le jae

hum tere dukh ko uThae hue yun phirte hain

jaise kandhe pe koi apna makan le jae

hum jo Duben to kinare se na dekhe koi

aur kuchh dur hamein aab-e-rawan le jae

koi chehra hai nazar mein na koi manzil hai

bas chale jaenge ye rah jahan le jae

jaane kis waqt badal jae bahaaron ka saman

aur mahke hue phulon ko KHizan le jae

jis taraf jaiye sailab-zada hai duniya

koi rakhne ko kahan apna makan le jae